بلوچ چاگرد ءِ کندیل، شھید سَبا دَشْتیاری
نبشتہ کار: امجد بیکس
دی بلوچستان پوسٹ
البت ماں کوڑھیں دُنیا ءَ ھرگیمُرتگیں ءُ وابیں چاگرد لیکھی ، زانتکاریں ءُ کواسیں مردماں چہ واب ءَ ٹوھینتگ ءُ پاد کُرتگ ، دیم پہ روژنائیں بانداتے ءَ سرکُرتگ ۔ یک چاگردے چہ تھاری ءَ کَشگ، لس مھلونک ءِ مجگانی تہ ءَ سما (شعور) ، اِلم ءُ زانت، آگھی دیوک ءُ راہ ء راست ءَ بروک کواس ءُ رھشون بوتگ اَنت ۔ ھمے داب ءَ شھید سَبا دَشْتیاری ءَ وتی زند پہ بلوچ چاگرد ءِ دیمروئی ءَ ندر کت ۔ آئی ءِ لوٹ ءُ واھگ ھمے بوتگ ۔ مئے راج وتی ماتی زُبان ءَ بہ وان ات ءُ وتی ماتی زُبان ءِ ارزشت ءَ بزانت ۔ مئے راج ءُ چاگرد چہ تھاری ءَ در بَہ اِت ، روژنائیں چاگردے بِہ بیت ، آجو ءُ وتواجاہ بِہ بیت ۔ بلے بُندپتر ءُ راجدپتر اے وڑیں کواس ءُ زانتکاراں مُدام یات کن اَنت ۔
شھید سبا گوش اِیت کہ:
“نہ زاناں چونیں اُمیتاں ھیاتاں”
“من ءَ کہ دیر اِنت کُشتگ جند ءِ براتاں”
نمیرانیں پروپیسر سبادشتیاری ءَ را ھُمائیون مُبارکی ءَ یک گُلگدارے گپتگ ءُ جُست کن اَنت ئِے کہ شُما چہ بُندر ءَ کُج ءِ جَھمند اِت ۔ سبادشتیاری پَسو دنت کہ ما بُندر ءَ رودراتکی بلوچستان بیلہ ءِ جَھمند بوتگ اِیں پد ءَ مئے کھول ماں دشتیاری ءَ یوسپزئی میتگ ءَ شُتگ ءُ جھمند بوتگ انت ءُ مئے کُٹوم ھم یوسُپزئی اِنت ، رند ءَ مئے بُن پیروک چہ دشتیاری ءَ لَڈ ءُ بار کن اَنت بِہ کراچی ماری پور ءَ کَیت ءُ مارا سَے سَد سال بیت کہ کراچی ماری پور ءَ نِشتگ اِنت ۔
واجہ شھید کندیل سبا دشتیاری 2 ستمبر 1953 ءَ ماری پور ءَ ودی بوتگ ۔ آئی ءِ پَنام گُلام ھُسین اَت ءُ آئی ءِ گُلنام سبادشتیاری اَت بلے گُلام ھُسین آئی بُن پیروک ءِ نام ھم بوتگ ءُ آئی آریپیں پِت ءِ نام مھمد اُسمان(محمدعثمان) اَت ۔ آئی ءَ وتی بُنگیجی وانگ چہ نیاآبادلیاری ءِ جمال پرائمری اسکول ءَ 1965 ءَ در بُرت ، میٹرک چہ اوکھائی میمن ھائی اسکول ءَ 1971 ءَ سرجم کُرت ءُ انٹرمیڈیٹ چہ ایس ایم کامرس کالج ءَ 1973 ءَ سرجم کُرت ۔ پد ءَ آئی 1976 ءَ چہ “الجامعتہ الاسلامیتہ” مُدرسہ ءَ نیکراھی زانت دربُرت ءُ ھمے زمانگ ءَ پرائیویٹ ءَ بی اے (B.A) ھم کُرت۔ ءُ اے میان ءَ چہ “خانہ فرھنگ” ءَ پارسی زبان دربُرت ءُ سند گپت ۔ رند ءَ آئی ءَ پرائیویٹ ءَ ایم اے( M.A) اسلامیات ءِ تہ ءَ 1978 ءَ سرجم کُرت ۔
1974 ءَ داں 1980 ءَ سبا ءَ ماں لیاری ءَ یک وانگجاھے ءَ اُستادے ءِ بستار ءَ وانینتگ، 1979 ءَ آئی ءَ چہ کراچی مزن شھدربرجاہ (یونیورسٹی) ءَ پی ایچ ڈی ءِ واست ءَ داکلہ زُرت بلے اے نیام ءَ آئی ءِ پی ایچ ڈی ءِ سُپروائیزر بیران بیت ءُ پد ءَ آئی ءَ ماں بلوچستان مزن شھدربرجاہ شال ءَ لیکچراری ءِ نوکری رَس اِیت ءُ آ چہ کراچی ءَ ماں شال ءَ روت، ھمے وڑ ءَ آئی ءِ پی ایچ ڈی ءِ واب ناسرجم بیت ۔ البت آ بلوچستان مزن شاھدربرجاہ ءَ اسلامیات ڈپارٹمنٹ ءَ داں سی سال ءَ “پلسپہِ اسلام”وانین اِیت ۔
شھید سبا دشتیاری یک کواس ءُ زانتکار، تچک ءُ راست گُشیں انسانے بوتگ ۔ آئی ءَ پہ بلوچی زبان ءُ لبزانک ءِ دیمروئی ءِ واست ءَ شپ ءُ روچ جد ءُ جُھد کُرتگ ۔ آئی ءِ بازیں کتابے چاپ ءُ شِنگ بوتگ کہ آ چوش اَنت :
1.فلسفہ اسلام و یونان 2.گُلکار ءُ چَکنکار 3.بلوچی زبان ءِ آکبت (2جلد) 4.مطالعہ فلسفہ 5.ھون ھوشام 6.گُنگدامیں سر زمین 7.اَنگریں واھگ 8.بے تواری ءِ دریا 9.ترانگانی بُنزہ 10.نمدیانی دروت 11.آس ءُ آسیب 12.سید ھاشمی, فن و شخصیت 13.بلوچی زبان ءُ لبزانک(3جلد) 14 آگھی ءِ واب
15.بلوچی سرٹیفیکیٹ کورس-
ازمی ھساب ءَ نمیرانیں سبا دشتیاری ءِ دل دوستیں پڑ آزمانکاری بوتگ ،آئی ءَ 1983 ءَ ماں بلوچی زُبان ءَ آزمانکاری بُنگیج کُرتگ۔ آئی ءِ اولی آزمانک ماھتاک سوگات ءَ “لوگانی بانکان” ءِ نام ءَ ءُ دومی آزمانک “آزگیں ٹپ” ءِ نام ءَ شِنگ بوتگ ۔ آئی ءِ سیمی آزمانک ماھتاک اُلُس ءَ 1984 ءَ “لولی” ءِ نام ءَ چاپ بوتگ ۔ رند ءَ شھید سبا دشتیاری ءِ آزمانکانی سَے کتاب چاپ ءُ شِنگ بوتگ کہ آئی ءِ اولی آزمانکی کتاب “ھون ھوشام” 1994 ءَ دومی “ترانگانی بُنزہ ” 2001 ءَ سیمی “آس ءُ آسیب” 2006 ءَ چاپ ءُ شنگ بوتگ اَنت۔
شھید سبادشتیاری بلوچی ءِ اولی آزمانکار اِنت کہ فیمننزم ءِ سر ءَ آزمانک نویس اِتگ آئی ءِ آزمانکانی ھند ءُ جاگاہ بلوچستان ءُ کراچی اِنت، آئی آزمانکانی بُنگپ بلوچ زالبولانی معاشی، چاگردی، جنسی، سیاسی، نشا، ناوانندگی، مزھبی ، رشوت ءُ دگہ بازیں بُنگپ اَنت ۔
سبا دشتیاری گواچن نویسے بوتگ ءُ بلوچ چاگرد ءِ راستی درانگاز اِتگ ءُ دیم ءَ آؤرتگ ۔ آئی ءِ آزمانک گیشتر ڈنی جیڑہ بزاں Extrovert بُنگپ ءِ سر ءَ نویستگ ۔ آئی ءِ آزمانکانی تکنیک : سادہ بیانیہ تکنیک ، وت جوڑگی تکنیک، گَپ ءُ رپَیّ تکنیک ءُ دگہ بازیں ھم تکنیک ءَ نویس اِتگ ۔ سبا ءِ آزمانکانی زُبان تچک ءُ سادگیں زبانے اِنت بلے اردو زُبان ءِ سان گندگ ءَ کَیت ءُ آئی ءِ آزمانکانی تَہ ءَ کارستانی بالادکشی باز گندگ ءَ کئیت ۔
شَھمیریں سبادشتیاری چہ اسکول ءِ زمانگ ءَ ماں اردو زُبان ءَ شائری بُنگیج کن اَنت ۔ وھدیکہ آ بلوچستان مزن شھدربرجاہ شال ءَ وانینگ ءَ بیت ءُ آئی ءَ را واجہ ابداللّہ جان جمالدینی شائری ءِ باروا سر ءُ سوج کن اَنت، دلبڈی ءُ سکیں دنت ۔ رند ءَ ماں شائری ءِ تھرانی بابت ءَ سبا ءِ کتاب “گُلکار ءُ چَکنکار ” 1990 ءَ چاپ ءُ شنگ بیت کہ پہ بلوچی زُبان ءِ نودربر ءُ شائراں سک ارزشت دار اِیت چہ ایشی ءَ ابید آئی ءِ شائری ءِ کتاب “گنگدامیں سرزمین” ھائیکو ءِ کتاب اِنت کہ بلوچی ءِ ھائیکواں ءَ نزآؤرتگ ءُ یکجاہ کُرتگ اَنت، سیمی “آگھی ءِ واب” آئی ءِ شائری کتاب اِنت کہ چہ زند ءَ رند 2015 ءَ سیدھاشُمی ریفریفرنس کتابجاہ چاپ ءُ شِنگ کن اَنت کہ اے کتاب ءِ تہ ءَ سبا ءِ دستونک ، لَچہ ءُ ھائیکو ھوار اَنت ۔
سبا ءِ شئیرے کہ :
“وشی ءَ گون ءُ سَکی ءَ ھمراہ نہ بنت”
“زر چنیں ھمبل ھچ کسی دوزواہ نہ بنت “
شھید سَبا ءَ پہ بلوچ چاگرد ءُ بلوچی زُبان ءِ دیمروئی ءِ ھاتر ءَ “سید ھاشُمی ریفرنس کتابجاہ” ءِ بُنھشت ماں ملیر کراچی ءَ ایر کُرتگ-
شھید سَبا ءَ پہ بلوچ چاگرد ءُ بلوچی زُبان ءِ دیمروئی ءِ ھاتر ءَ “سید ھاشُمی ریفرنس کتابجاہ” ءِ بُنھشت ماں ملیر کراچی ءَ ایر کُرتگ ءُ پہ اے گرانیں کار ءِ واست ءَ بازیں جُھد ءُ جپاھے کَش اِتگ ۔ بلوچی زُبان ءِ اولی لبزبلد کہ سیدھاشُمی ءِ “سید گنج ” اِنت کہ سید ءِ زند ءَ چاپ نہ بوتگ بلے سبا ءِ جُھدانی برورد ءَ چاپ ءُ شنگ بیت بلوچ راج ءِ دیم ءَ آرگ بیت ۔ سبا چہ بلوچی زبان دوست نمیرانیں سید ھاشُمی ءَ سک اسرمند بوتگ ءُ دومی چہ واجہ اَبداللّہ جان جمالدینی ءَ ھم اسرمَنْد بوتگ ، آئی ءَ سید ءُ جمالدینی ءَ را وتی پِگری ءُ روھانی اُستاد گُشتگ ۔سبا ءَ پہ بلوچی زُبان ءِ دیمروئی ءَ شَپ ءُ روچ جُھد کُرتگ کہ آئی ءَ را 1 جون 2011 ءَ دژمناں گونڈلیں تیرانی آماچ کُرت ءُ شَھید کُرت ۔ آئی ءِ کبر ماں میوہ شاہ کبرستان کراچی ءَ اِنت ۔
ھر چاگرد ءِ کہ دیمروئی ءِ واست ءَ ءُ چہ تھاری ءَ کشگ ءُ روژنائی ءِ برگ ءِ واست ءَ کہ شھپگریں ءُ لیکھی انساناں جَد ءُ جُھد کُرتگ گُڑاں دُژمن ءُ بدواھاں آئی ءَ را زوت بیران ءُ نمیران کُرتگ ۔ مرچی شھید سَبا دَشْتیاری، چہ جسمانی درگت ءَ چہ ما چہ جُتا اِنت بلے لیکھی ، پکری ھساب ءَ مئے ھمراہ اِنت ۔ آئی ساچتگیں آزمانک ءُ شائری، پنت ءُ سوج مارا جْوانیں درس ءَ دینت کہ ما وتی اے وڑیں کواس ءُ زانتکار، ساچشتکارانی روچ ءَ برجم بہ دار اِیں ءُ آیانی لیکھہ ، لوٹ ءُ واھگاں بِہ پھم اِنت ءُ بِہ زان اِیں اگاں ما چہ وتی زانتکار ءُ کواسانی روچ ءَ بیگانگ بَہ اِیں گُڑاں ما روچ ء رھمی چہ تھاری ءِ دَنز ءُ مُجاں اَندیم بَہ اِیں ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔