پاکستانی پوج ءِ پیسریگیں اپسر ءَ قمر جاوید باجوہ ءِ نام ءَ نمدی: “زھگ ءَ اگاں یل دات نہ کن ئے گُڑ ءَ کم چہ کم آئی ءِ جرم ءِ بارو ءَ گُشگ بہ بیت”
پاکستانی پوج ءِ ریٹائرڈ میجر مھمد صالح ءَ پاکستانی پوج ءِ سروک جنرل قمر جاوید باجوہ ءِ نام ءَ نبشتگیں نمدی ءِ تہ ءَ وتی پنچ سال پیسر پوج ءِ دست ءَ دزگیر بیتگیں زھگ ءِ یل کنگ ءِ لوٹ کُتگ۔
مھمد صالح ءَ وتی نمدی ءِ تہ ءَ اے ھم گُشتگ کہ اگاں پوج آئی زھگ ءَ یل کُت نہ کنت گُڑا کم چہ کم کھول ءَ آئی ءِ جرم ءِ درگت ءَ گُشگ بہ بیت۔
دومی نیمگ ءَ پوجی اھوالانی رد ءَ عبداللہ صالح ءِ ھلاپ ءَ سنگینیں بھتامانی سبب ءَ دزگیر کنگ بیتگ ءُ جیڑہ ءِ سنگینی سبب ءَ اھوال گُشگ ھم بیت نہ کن اَنت۔
پوجی اھوالانی رد ءَ دزگیریں عبداللہ صالح ءِ ھلاپ ءَ کہ ھما بھتام اَنت آیانی درگت ءَ درستیں اُرت چاری کنگ ءَ پد گام زیرگ بیتگ اَنت ءُ ڈیھی قانودانی رد ءَ اے جیڑہ چارگ بیگ ءَ اِنت۔
جنرل قمر جاوید باجوہ ءَ نبشتہ بیتگیں نمدی ءِ تہ ءَ مھمد صالح ءَ وتی زھگ ءِ دزگیری ءِ دلجمیں اھوال ھم داتگ اَنت۔