آزمانک
ھزار ڈالر
نبشتہ کار او ہنری ( امریکہ )
رجانکار : هسابجار
دی بلوچستان پوسٹ
” هاں بزور تی ھزاریں ڈالراں ! “
وکیل ٹالمین ءَ گوں سنگین ءُ گرانیں توارے ءَ گُشت –
ورنائیں جیلین ءَ زرانی سُبکیں لفافہ دست جت ءُ ٹکّ ئےِ دات –
” پو اے وَ سک باز انت ” آئی ءَ گوں وکیل ءَ الوت کُت ءُ گُشت –
” اگاں اے زر ده ھزار ڈالر بوتین انت تہ کسے ءَ هم وشی ءَ شاتکامی کُت کتگ ات ، تو وَ زان ئے کہ پنجاه ڈالر ءَ گوں شاتکامی کنگ نہ بیت -“
” تو وتی ناکو ءِ مرگ ءَ پد آئی ءِ وصیحت اش کتگ -” وکیل ٹالمین ءَ وتی گپ ءَ برجاه داراں گُشت ” منی دل ءَ تو آ شر دلگوش نہ کتگ من ترا یک ( شِقے ) ءِ درگت ءَ سرپدی دیاں انچو کہ اے ھزاریں ڈالراں هرچ کن ئے تہ ترا مارا هال دیگی انت کہ تو کجام کارانی دیم ءَ ھر چ کتگ انت ، من ءَ امیت انت کہ تو وتی هدامرزی ایں ناکو ءَ کم شرپ نہ کن ئے -”
“گُڑا ترا منی گپ باور کن انت….؟”
ورناه ءَ گُشت –
جیلین پہ مردمے ءِ شوهاز ءَ شُت کلب ءَ کہ آئی ءَ مدام اولڈ برے سن ءِ نام ءَ آ توار کتگ ات ، آئی ءِ اُمبر کساس چِل سال بوتگ ات سکیں هاموشیں مردمے ات ءُ گوں چاگرد ءَ رِتک ءُ ریچ نہ ات ، آ یک کُنڈے ءَ نشتگ ات ءُ کتابے وانگ ءَ ات ، وهدے برے سن ءَ جیلین وتی نیمگ ءَ آیگ ءَ دیست تہ گینسارت ئےِ کش ات ئِے ءُ کتاب ئےِ ایر کُت ءُ عینک ئےِ چہ چماں کش ات –
” پہ تو من ءَ یک تژن ءُ بچکندی کسھے گون -”
جلین ءَ گُشت –
” من گُشاں کہ تو اے کسہ ءَ ( بلئیرڈ روم ) ءَ دگہ کسے ءِ گورءَ بیار ، تو وَ زان ئے کہ تئی کسھاں چہ من ءَ بد کئیت ” برے سن ءَ گوں بیزاری ءَ گُشت –
” اے چہ ھروچیگیں کسھاں چٹا جتائیں کسھے ” جیلین ءَ سگریٹ ءَ ترّیناں ءُ گُشت – ” بلے تئی گورءَ کسہ ءِ آرگ ءَ من ءَ وشی بیت ، بلئیرڈ ءِ بولانی توار ءَ اے وشیں کسہ بے تام بیت -”
” من انی وتی هدامرزی ایں ناکو ءِ وکیل ءِ گورءَ چہ پیداکاں ، آئی ءَ پہ من ھزار ڈالر ھشتگ ءُ دنیا ئےِ سپر کتگ –
نو جُست اش انت کہ یک مردمے گوں اے زراں چے کُت کنت -”
اولڈ برے سن ءَ گوں بیزاریں دروشمے ءَ گُشت – ” منی هیال ءَ سَیپٹِی مَس جیلین و لک پتی یے بوتگ -”
” هو تئی راست انت ”
جلین گل بوت ءُ آئی ءِ گپ ئےِ گپت گوں –
” همے گپ ءَ من ھیراناں کہ آئی ءَ وتی مڈی ءِ یک مزنیں بھرے زندمان ءِ هاترءَ بکشاتگ ، بازیں زرے پہ سائنس ءِ پٹ ءُ پولی کاراں ھشتگ ءُ آ دگہ زر پہ هسپتال ءِ جوڑ کنگ ءَ داتگ انت چریشاں ابید چیزے انچائیں سوگات هم ایر ئےِ کتگ ، کنوری ءُ لوگ ءِ اے دگہ چلوپگ کاراں پہ مندریکے ءُ ده ، ده ڈالر دیگ ءِ گُشتگ ئےِ ، ءُ پہ آئی ءِ برازتک ءَ بس ھزار ڈالر -”
” آیا تئی هدامرزی ایں ناکو ءِ وصیحت ءِ تہ ءَ دگہ کسے ءِ نام هم ھوار انت ؟” اولڈ برے سن ءَ پُرس ات۔
” اناں ” جیلین ءَ گُشت ” یک جنکے ھست بانک بیڈن نامین ئےِ کہ آئی ءِ چار ءُ گُزار کنوک منی ناکو بوتگ ءُ همائی ءِ لوگ ءَ انت ، سکیں بے تواریں ءُ شریں مردمے …. بد بهتی ءَ یک انچیں مردمے ءِ چُک انت کہ منی ناکو ءِ سنگتے ات ، اڑے ! من بے هالاں ….
آ هم همے ھیرانی ءِ تہ ءَ ھوار انت کہ مندریک ءُ ده ڈالر ے بہ رسیت گوں ، من لوٹاں کہ منی نام هم همے لُڑ ءَ ھوار بوتیں ، من دو شیشگ وائن زُرتگ ات ، ءُ مندریک همے بار ءِ وائن آروک ءَ سوگات کتگ ات ءُ منی جان چُٹ اتگ ات ، نوں تو من ءَ بُگش کہ ھزار ڈالر ءَ مردم چے کت کنت ؟”
اولڈ برے سن ءَ وتی عینک ساپ کُت ءُ بچکند ات ، آئی ءِ بچنکدگ ءِ مول ءَ جیلین سرپد بوت کہ منی اے اٹکل هم چو مدامی ایں اٹکلانی وڑءَ هچ دوست ئےِ نہ بوت –
” بازیں انچیں کار است انت کہ مردم گوں ھزار ڈالر ءَ کُت اش کنت ، برے سن ءَ گُشت – ” بلے تو …..؟ ” آئی ءَ یک گونڈیں ٹکّے جت ، هاں لالا بوبی جیلین !! همے یکیں کار پشت کپتگ کہ توئےِ وشی ءَ کُت ئےِ کن ئے ، اے زراں گوں پہ بانک لوٹا.لورئیر ءَ یک هارے بہ گِر ءُ آئی ءَ سوگات ئےِ بہ کن ءُ آئی ڈابو ( امریکہ ءِ یک مُلکے ) ءَ برو ، اود ءَ یک واڑے ءَ بہ نند ، منی سوج ءَ زیرئے آ واڑ هم میشانی بہ بیت پرچاکہ من ءَ میش بھہ دوست نہ بیت -”
” منتوار ” جیلین ءَ گوں پادایگ ءَ گُشت – ” من زانتگ ات کہ تو من ءَ ردیں سوج نہ دے ئے – اولڈ برے سن تو من ءَ شریں راھے شون دات ، من اوں اے زراناں بس پہ یک کارے ءَ ھرچ کنگ لوٹ اتگ ات ، من ءَ روگ لوٹ ایت کہ آھاں رپورٹ ءَ بدے آں -”
جیلین ءَ ٹیکسی یے لوٹائینت ءُ ڈریور ءَ جاگہ ءِ گُشت ئےِ ” کولمبین تهیٹر ”
تهیٹر ءَ مردمانی مُچی ات ، بانک لوٹا وتی مراگش ءِ چِن ءُ لانچ ءَ گوں دلگوش ات ، وهدے آئی ءِ کاردار ءَ واجہ جیلین ءِ آیگ ءِ هال دات –
” بِلّے کئیت تہ ءَ ” بانک لائیر ءَ گُشت –
” اے چی یے یار ؟ من ءَ زوتاں تلو ءِ سرءَ سر بوهگی انت ”
” من ترا دیراں نہ داراں ، کمو مھتل بو ، ترا سُهرانی تہ ءَ گونڈیں چیز کجام گیشتر دوست بیت ؟ منی گورءَ ھزار ڈالر هست -”
بانک لائیر ءَ پسو دات : ” تو ڈیلاسٹیسی ءِ هار دیستگ ات کہ دوشی گور ءَ ات ئِے – ” ٹِفنی ” ( سهتانی دکانے ) ءَ آئی ءِ نھاد دو
ھزار ءُ دو سد ڈالر انت -” داں اینچُک ءَ بانک لائیر تلو ءِ سرءَ توار کنگ بوت –
جیلیں مدان مدان رواں بوت داں تهیٹر ءَ چہ ڈن ءَ دراتک کہ اُود ءَ آئی ءِ ٹیکسی آئی ءِ ودار ءَ ات –
” اگاں ترا ھزار ڈالر بہ رسیت تو اشاں چے کن ئے ؟”
جیلین ءَ ٹیکسی ءِ ڈریور جُست کُت –
” من کمار جاهے پچ کناں ” ڈریور ءَ اچُست ءَ پسو دات – ” من انچیں جاهے زاناں کہ اُود ءَ من زرانی امبارے بوتک کناں ، اگاں تو کارے ءِ درگت ءَ پِگر کنگ ءَ ئے تہ اے درگت ءَ من تئی کمک ءَ کُت کناں ، ” اناں یار ” جیلین ءَ گُشت ” من بس انچو جُست ءَ اتاں ، دیم پہ بلاک لمبر 8 ءَ رواں کن -”
جیلین چہ ٹیکسی ءَ ایراتک – دمک ءَ کورے نشتگ ات ءُ پنسل بها کنگ ءَ ات – جیلین شُت همائی ءِ دیم ءَ نشت –
” پهل کن ! تو من ءَ گُشت کن ئے اگاں ترا ھزار ڈالر بہ رسیت تو اشاں چوں کن ئے ،؟ جیلین ءَ دست بست انت …
کوریں پیر مرد ءَ وتی کوٹ ءِ تھی نیمگ ءِ کیسگ ءَ چہ کتابُکے کش ات ءُ آئی ءِ دست ئِے دات – جیلین ءَ کتابُک پچ کُت تہ بینکے ءِ وامانی کتابُکے ات – آئی ءِ تہ ءِ نبشتگاں چہ زانگ بوت کہ پیر مرد یک ھزار هپت سد ءُ پنجاه ڈالر ءَ بینک ءِ وامدار ات – جیلین ءَ وامانی کتابُک پدءَ پیر مرد ءِ دست ءَ دات ءُ دوار ٹیکسی ءِ راه گپت –
” من راه شمُشتگ اتاں -” آئی ءَ گپ بندات کُت – ” بریں ٹالمین ءُ شارپ ءِ کارگس ءَ -”
وکیل ٹالمین ءَ بهمنتگی ءُ جُستی نگاهاں گوں آ چار ات –
” من پهلی لوٹاں -” جیلین ءَ گوں وشروی ءَ گشُت – ” من ءَ اے جُست کنگی ات کہ منی ناکو ءَ پہ بانک ہیڈن ءَ مندریک ءُ ده ئیں ڈالراں چہ ابید دگہ چیزے ءِ هم گُشتگ -؟ ”
اشاں ابید دگہ هچ چیز ءِ نہ گشتگ ئےِ -” واجہ ٹالمین ءَ پسو دات –
” تئی منواراں واجہ !” جیلین مرد ءِ منت گرگ ءَ پد شُت دیم پہ ٹیکسی ءَ – آئی ءَ ڈریور ءَ وتی هدامرزی ایں ناکو ءِ لوگ ءِ ڈس دات ءُ ٹیکسی ءَ نشت –
بانک ہیڈن ماں کتابجاه ءَ نشتگ ات ءُ نمدی نویسگ ءَ ات ، لاگریں کسانسالیں جنکے گوں پُرسی سیاھیں پوشاکان ات ، ءُ آئی ءِ چم لائک ئے چارگ ات انت ، جیلین انچو لوگ ءَ پُترت گُش ئے اے امروز پرآئی ءَ نہ ات –
” من ٹالمین ءِ گورءَ بیتگ ءُ پیداگاں -” آئی ءَ وتی آیگ ءِ سَوّب گُشت ، آئی ءَ دوار وصیحت ءِ کاگد چار ءُ بیچار کتگ انت ، تہ آئی ءَ دیست کہ……
جیلین ءَ کانودی گالبندے ءِ یاد کنگ جهد کُت ،
” آئی ءَ چہ وصیحت ءِ کاگداں دگہ کاگدے دست کپتگ ، آئی ءِ تہ ءَ انچو زانگ بیت کہ منی ناکو ءَ وتی وصیحت دوار جوڑ کتگ ، چرے چیزاں ابید دگہ ھزار ڈالر پہ ترا ھشتگ ئےِ ، ٹالمین ءَ من ءَ پہ تئی زرانی سر کنگ ءَ دیم داتگ ، بزو تی امانت انت -”
جیلین ءَ زر آئی ءِ دست ءِ گورءَ ڈسک ءِ سرءَ ایر کُت انت ، بانک ہیڈن ءِ دیم رُژناه بوت ” اوه ! اوه! ءَ ابید آئی ءَ دگہ هچ گُشت نہ کُت –
جیلین ءَ وتی دیم ترینت ءُ چہ دریگ ءَ ڈن ءِ ندارگاں دلگوش بوت – آئی ءَ مداں مدان ءَ گُشت “اگاں من بہ گشاں ءُ بیت کنت کہ تو سرپد ئے هم من ءَ گوں تو مهر انت – ”
” من ارمانی آں ” بانک ءَ زرانی چست کنگ ءَ گوں گُشت –
” اشی ءِ هچ وڑیں هرچ نیست …..؟
جیلیں ءَ وشروی ءَ گوں پُرس ات –
” من ءَ پهل کن ” ہیڈن ءَ دوار گُشت –
” من یک کلوے نبیس ات کناں ؟”
جیلین ءَ بچکنداں جُست کُت – بانک ہیڈن ءَ آئی ءَ کاگد ءُ کلم دات انت ءُ وت دوار شُت وتی نبشتہ کنگ ءِ ٹیبل ءِ دیم ءَ نشت –
جیلین ءَ یک رپوٹے نبشتہ کت کہ آئی ءَ وتی هزاریں ڈالر چتو هرچ کتگ انت –
” جیلین ءَ وتی ھزاریں ڈالر پہ مدامی وشیاں آزمان ءَ چہ ایرآؤرتگیں زمین ءِ سر ءِ دوستریں ءُ شرتریں ھستی یے ءَ پہ هرچ کتگ انت -”
جیلین ءَ وتی نبشتگیں کلوہ لفافہ ءِ تہ ءَ کُت ، سرئِے جهل کُت ءُ بانک ہیڈن ئےِ اجازت کُت ءُ چروداں دراتک –
آئی ءِ ٹیکسی ءَ ” ٹالمین ءُ شارپ ” ءِ کارگس ءِ دیم ءَ اتک ءُ داشت –
” من وتی ھزاریں ڈالر هرچ کتگ انت ، آئی ءَ پہ گل ٹالمین هال دات – ” ءُ من وتی زرانی ھرچ کنگ ءِ هال دیگ ءَ اتکگاں -” آئی ءَ اسپیتیں لفافہ وکیل ءِ ٹیبل ءِ سرءَ ایر کُت – واجہ ٹالمین ءَ لفافہ کار نداشت ءُ شُت تہ ءَ وتی همراھے توار کُت ، ھردکاں یک بلاھیں الماری یے ءِ تہ ءَ چیزے ءِ پٹگ ءِ جهد کُت ، گونداں گوں لچینتگیں یک بندیں لفافھے زُرت ءُ آؤرت ، وهدے آیاں کہ لفافہ پچ کُت تہ آئی ءِ تہ ءِ نکان ءَ آ ھیراں کُت –
ٹالمین ءَ نکان ءِ جهگیری کُت ءُ گوں جلین ءَ تران کُت –
” واجھیں جیلین ! تئی ناکو ءِ وصیحت ءَ دگہ یک گیشی یے اے بوتگ ، اے آئی ءِ جند ءَ من ءَ داتگ ءُ من ئِے کڈن کتگ ، داں تو وتی میراس ءَ چہ رستگیں اے ھزاریں ڈالرانی ھرچ کنگ ءِ هال ءَ مارا مہ دے ئے ما اے لفافہ ءَ هچ وڑا پچ مہ کنیں – چو کہ تو وتی اے کار برجم کتگ ، من ءُ منی همکار ءَ اے نبشتہ ونتگ ، من اشی ءِ سرجمی ءَ گیشوار ءَ کناں –
” تئی ھزاریں ڈالرانی هرچ ءِ کنگ ءِ پدءَ ما سرپد بوت کنیں کہ ترا اے سوگات دیگ بہ بیت کہ مہ بیت ، اگاں تو وتی زر جوان هرچ کتگ انت ، تہ مارا لوٹیت کہ اے پنجاه ھزاریں ڈالراں ترا بدے ایں، اگاں تو اے زر هم چو پیش وڑءَ بے سریں کارنی دیناں داتگ انت انچو کہ تو یک کش ءَ انچو کتگ گڑا ما هچ چک ءُ پد مہ بیں ءُ اے پنجاھیں ھزار ڈالراں میڈم ھیڈن ءَ بہ دھیں کہ همائی ءِ گورءَ بوتگ –
نی من ءُ واجہ شارپ تئی ھزاریں ڈالرانی ھرچ کنگ ءِ رپوٹ ءَ چاریں –
وهدے واجہ ٹالمین شُت پہ رپورٹ ءِ نیمگ ءَ چہ آئی ءَ پیسر گشادی ءَ جیلین ءَ رپورٹ ءِ لفافہ چست کُت ءُ گوں رپورٹ ءَ ھور درت ءُ چُنڈ ئےِ کیسگ ءَ کُت انت –
” تو راست گُشت واجہ ! اے رپورٹ ءِ چار ءُ بیچار کنگ ءِ هچ زلورت نہ انت – من زاناں کہ شما اشی ءَ سرجمی ءَ سرپد بوت هم نہ کن ات، من وتی ھزاریں ڈالر جواه ءَ باہینتگ انت –
” شمئے روچ وش بات سلامتیں مردماں !
وهدے جیلین شُت تہ ٹالیمن ءُ شارپ ارمانی بوت انت ءُ وتی سراش سُرینت –
برانڈه ءَ لفٹ ءِ ودار ءَ اوشتاتگیں جیلین ءِ وشیں دهنے ءَ گوں شیزارگ ءِ توار پیداک ات –
دی بلوچستان پوسٹ: اس مضمون میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔
