استال دروشمیں شاشان
نبشتہ کار: مھروان کمبر
دی بلوچستان پوسٹ
چیرمین شاشان : ھما اِنت کہ تئی نمیرانی ءِ ھال اِش کُتگ من تورشت چکاریں موسمے ءِ کُماران آں۔ چُوناھی ءَ من ءَ دیر اِنت کہ ھمے دابیں موسماں زندگی ءِ پشت کپتگیں روچاں تیلانک دیاں ءُ وتی باریگ ءِ ودار ءَ آں۔ نہ وانگ ءَ لزّتے ھست نہ نویسگ ءَ لبز دست کپ ایت، نہ من ءَ تھنائی کرار دنت، نہ مُچّیانی تہ ءَ شور ءُ شار۔۔۔ بس ابیتکی ءَ وتی ملگور شنگ ءُ تالان کُرتگ اَنت۔
چیرمین شاشان : تئی نمیرانی ءَ پد مردم چے بہ گُش ایت چے بہ جیڑ ایت، تو اَنچیں کردے ءِ واھند ئے من ستر بہ گُشاں، تئی ستاہ ءَ بہ کناں، بلے تئی ھما ٹوھیں ھستی اِنت یا کہ ٹوھیں کرد اِنت آئی ءِ دیم ءَ منی چاریں دانک ھچ نہ اَنت۔
چوناھی ءَ ھما کہ زمین زادگ اَنت آ پہ زمین ندر بہ اَنت زمین ءَ ابید دگہ ھچ چیز نہ جیڑ اَنت۔ شاشان جان تو ھم ھما زمین زادگیں مردمانی رم ءَ ھوارئے۔۔۔ ترا دُرستاں چہ گیش زمین دیم ءَ اَت. تو بس زمین جیڑگ ءَ اِت ئے ءُ زمین پند ءَ اِت ئے۔ تئی وڑیں زمین زادگ نہ مر اِنت بلکیں زمین ءِ سینگ ءَ چو دل ءَ دریک انت۔
چیرمین شاشان : تو ھما چراگ اِت ئے کہ تھاریاں گوں جنگ ءَ اِت ئے۔۔۔ تو ھما آواز ات ئے کہ تیرانی توار ءَ ھم اِشکنگ بوت ئے۔۔۔ تو ھما کول ءُ کرار اِت ئے کہ توکلی ءَ گوں سمّو ءَ کُتگ اَت ءُ سرمچاراں گوں زمین ءَ۔۔۔ وھدے دُژمن ءِ تیر تئی سینگ ءَ پیوست بوت ءُ تو زمین ءِ دلبند ءَ کپت ئے۔ گُڑا کوھاں لرزگے بندات کُت۔ گوات ءَ وتی کِشک مٹینت اَنت۔ رُولھی شینک زرد نہ اِت اَنت بلکیں تئی ھُونانی رَنگ اِت انت۔ نوشکی ءِ ھاک ھیسکارگ ءَ اَت۔ ما دیستگ اَت۔ تو زمین ءِ سر ءَ نہ کپتگ ات ئے بلکیں زمین ءَ سجدگانی ساھتاں بوسگ ءَ اِت ئے تئی زمین ءِ سر ءَ ھما جاہ ءَ کہ دُژمن ءَ وتی ھنکین کُتگ اَت مرچی تئی ھُونانی شل بوتکگ اِت انت ءُ دُژمن ءِ ھر چیز ءَ روپان ءُ بران اِت انت۔
چیرمین شاشان : تو اَنچو رَپت ئے کہ اَنچو شپ ھلاس بہ بیت بلے بام مہ بیت۔ اَنچو کہ کُونج کتاراں گسر بہ کپ انت اَنچو کہ مُرگ ویرانیں درچکاں میا اَنت۔ تو رَپت ئے بلے تئی مھلبیں گیرانی وشبو، تئی پادانی چِست بیتگیں دنز، تئی گُڈی کندگ اَنگت نوشکی ءُ شور ءِ ملپدیں زیداں پش کپتگ اَنت۔ تئی رَپتن ءَ چہ پد موسم مٹ بوگ ءَ تُرسگ ءَ اَنت۔ ھُورانی ترمپ زمین ءِ سر ءَ کپگ ءَ پیسر اُوشت ءِ آماچ اَنت، بگند ئے آ سرپد اَنت کہ تو اِد ءَ نہ ئے۔
چیرمین شاشان : تو مات ءِ شکم ءَ ودی بوتگیں وابے ات ئے تو ھما اِت ئے کہ کتاب ءَ چہ دراَتک ئے ءُ توپک ءِ نیمگ ءَ اَتک ئے، کہ گوستانگ ءِ تہ ءَ تئی نام تھنا وانگ مہ بیت بلکیں تئی نام ءِ سر ءَ زندگی بہ بیت۔ تو لاھور ءِ دمکاں گار نہ بوت ئے، نیکہ تو شھر ءِ دلکشیں رنگانی تہ ءَ بیگواہ بیت ئے بلکیں تو وت کوھانی امبازاں چو چراگے ءَ بلان بوت ئے۔
چیرمین شاشان : شپ ءِ ھما پاس ءَ کہ آزمان گوں جلشکیں استالاں ماھے ودار ءَ اُوشتاتگ اَت۔ وھدے گوات دُژمن ءِ بُنجل ءَ چہ پاداں داران ءُ گوزان اَت۔ تو گوں وتی ھمراھاں دُژمن ءِ نیست ءُ نابود کنگ ءَ بے توار جنگ ءَ اِت ئے۔ تئی تھانگ ءَ یک توپانے چول جنگ ءَ اَت۔ چیرمین! تیر ءُ تراکانی تواراں زمین جمبگ ءَ اَت۔ شُما کبزہ گیریں لشکری کارمندانی انگیر ءَ اَت ئے، بلے انگت دُژمن گریوگ ءَ اَت، ءُ دُژمن ءِ گریوگانی توار شُمے جوزگاں گیش کنان اِت انت۔ پد ءَ ھما ساھت اَتک کہ شوروھاں مُوتک الھان کُت۔ وھدے تیراں کسمت نبشتہ کُت ءُ تو کپت ئے۔ ناں ناں تو نہ کپت ئے بلکیں ھاک ءِ وشبوھاں ھوار بوت ئے۔ تو زمین ءِ بھر بوت ئے۔ تو آجوئی ءِ ھما توم جوڑ بوت ئے کہ ابدمانی ءِ ھُور ترا رودینیت۔
چیرمین جان : تئی داتگیں دیمھونی یک وشبوھے کہ کوھاں وتی دلبند ءَ مُشتگ۔ ھما سنگ ءِ سر ءَ تو وتی گُڈی ساہ زُرت آ سنگ ادیرھے جُوڑ بیتگ ءُ کوہ تئی ھُونانی بالینتگیں چراگے۔۔۔ تو نمیران بوت ئے بلے تئی بڑ ءِ توپک کس ءَ کپگ ءَ نیشت دگہ زمین زادگے ءَ وتی کوپگاں درتک۔۔۔ نی تئی ھمراہ ھر جنگ ءَ پیش تئی نام ءَ گر اَنت ءُ توپکاں چمبر کن انت۔
چیرمین شاشان : تئی ھُوناں دُژمن ءِ بُنجل ءِ سر ءَ مک بوتگیں بیرک ءِ زمین مٹ کُت، نی تئی وتن ءِ بیرک گوں تئی ھُونانی وشبوھاں دُژمن ءِ بیم آماچ کنگ ءَ ساہ زیر ایت۔ گوں تو کول ءُ کرار کن اِیں کہ بلوچستان ءِ تہ ءَ ھِچ چُشیں بُنجل نہ مان انت کہ آیانی دست بلوچ پُسگانی ھُوناں چہ ھِنّی بہ بنت۔ ما تئی نام ءَ آجوئیں بلوچستان ءِ ساچ ءَ نبشتہ کنیں۔تئی ادیرہ ءَ ھما کوھانی دامن ءَ کن اِیں کہ ھود ءَ سُھب ءِ جان کش اِتگیں بام تئی نام ءَ بہ درپش ایت۔
دلگوش: (اے موتکے نہ اِنت گوستانکے، اے زمین ءِ آمید گس ءَ یک گواھی ءِ کہ شاشان ءَ وتی سر بکشات، بلے وتن ءِ گُلامی نہ من اِت۔)
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-