عظمت رند ءِ کُشگ ءُ آئی ءِ ناشناسیں جاھے ءَ کل کنگ ءِ ھال راست کتگ ءُ پاکستانی لشکر ءَ وت آئی ءِ کھول ءَ را داتگ۔
بلوچستان ءِ دمگ نصیر آباد ءِ ورنا عظمت رِند بندی جاہ ءَ بندیگ کنگ ءِ وھد ءَ پاکستانی لشکر ءَ لٹ ءُ کٹ کنگ ءَ پد کشتگ ءُ آئی ءِ جون کل کنگ بوتگ۔
بلوچ یکجھتی کمیٹی ءِ رد ءَ عظمت رند پاکستانی لشکر ءَ 5 جون 2025 ءَ ڈیرہ مراد جمالی ءِ سبزی بازار ءِ نزیک ءَ روچ ءِ رھمانی دزگیر کتگ ءُ زورانسری ءَ بیگواہ کتگ۔
گل ءِ گشگ اِنت کہ عظمت رند ءَ را درکانودی بندیگ جاہ ءَ سکا لٹ شاپ کنگ بیتگ ءُ ایشی ءِ آسر ءَ آ بیران بیتگ۔ 9 جولائی ءَ آئی ءِ کھول ءَ پاکستانی لشکر ءِ کارندھاں ھال دات کہ عظمت زندان ءَ بیران بوتگ۔
بلوچ یکجھتی کمیٹی ءِ رِد ءَ آ نہ ایوک ءَ بندیگ جاہ ءَ کُشگ بوتگ بلکیں آئی ءِ جون نصیر آباد ءِ دمگ چھتر ءَ ویرانیں جاھے ءَ چیرکائی کل کنگ بوتگ ءُ کھول ءَ را اسلامی ءُ روایتی دودانی رد ءَ کل کنگ ءِ ھک ھم نہ داتگ۔
گل ءَ اے وئیل ءَ بلوچستان ءَ برجاھیں بلوچ نسل کشی ءِ بھر لیک اِتگ ءُ اے وئیل ءِ سر ءَ سکّا زھر ءِ درشان کنان ءَ لوٹ کرتگ کہ بلوچستان ءَ زورانسری ءَ بیگواہ کنگ ءُ درکانودی ءِ کوشی وئیلانی سر ءَ تچکیں پٹ ءُ پول کنگ بہ بیت۔
زانگ بہ بیت کہ بلوچستان ءَ اے رنگیں بازیں ویل دیم ءَ اتکگ کہ ایشانی تہ ءَ پاکستانی لشکر ءِ دست بندی ءِ وھد ءَ ٹارچر ءِ سوب ءَ مردمانی بیران بوھگ ءِ ھال رس اِتگ انت۔
گوستگیں ماہ ءِ 10 جون ءَ بلوچستان ءِ دمگ کولواہ رودکان ءَ بیڑ ءِ وھد ءَ نواب ء نوربخش دزگیر کنگ بوتگ ءُ جرک بنجل ءَ برگ بوتگ کہ رند ءَ آئی ءِ لاش دزکپتگ-
دمگی مردمانی رد ءَ نواب ءِ لاش ءِ سر ءَ سکا لٹ ءُ کٹانی نشان گندگ بوتگ اَنت ءُ لاش ءِ جاور ءَ چہ اے گپ ءِ پدر بوھگ ءَ اِنت کہ آئی ءَ را گوں بجلی ءِ کرنٹ ءُ کشگ بیتگ-
ھمے رنگ ءَ لاشانی نہ دیگ ءُ ناشناسیں جاھاں کل کنگ ءِ وئیل ھم پدر بوتگ اَنت کہ مئی ءَ پاکستانی لشکر ءَ تربت ڈنک ءَ سئے ورناھانی لاش وتی دستیگی ءَ کتگ اَنت کہ چہ ھاندان ءِ تچکیں زھرشانی ءَ پد ھم لاش آھانی دست ءَ نہ داتگ اَنت۔
لاشانی نہ دیگ ءَ پد تربت ءَ ڈی بلوچ ءَ سیاد ءُ وارساں بازیں روچ ءَ دھرنا داتگ بیتگ ۔ پد ءَ انتزامیہ ءَ اے سئیں مردم بے کپن ءَ دمگی کبرستان ءَ کل کتگ انت۔ وھدے کہ کھولاں چہ کبراں لاشانی درگیجگ ءِ جھد کتگ گڑا پولیس ءَ کھولانی سر ءَ زوراکی کتگ۔