میان استمانی لبزانکی ءُ انسانی ھکانی گل پین انٹرنیشنل ءَ وتی شنگ کرتگیں درشان ءِ تہ ءَ نامداریں بلوچ زالبول انسانی ھکانی باسک ڈاکٹر ماھرنگ بلوچ ءِ زوت ءَ زوت بید شرت ءَ یل کنگ ءِ لوٹ کتگ ۔
ھمے وھد ءَ گل ءَ آئی ءِ دزگیری پاکستان ءِ تہ ءَ آزاتی ءَ وتی ھیالانی درشان ، ریاستی زوراکی ءُ زالبولیں باسکانی ھاموش کنگ ءِ پالیسی ءِ گوشتگ ۔
پین انٹرنیشنل ءِ سروک جوڈیتھ ہل ءَ گوشتگ کہ ما گوں ماھرنگ ءَ ھمکوپگ ایں کہ آ یک نہ ترسیں انسانی ھکانی پھازدار ءِ بوتگ کہ آ ریاست ءِ پاکستان ءَ ھمے واست ءَ بندیگ کتگ کہ آئی ءَ بلوچ راج ءِ ھک ءُ انساپ ءِ ھاتر ءَ توار چست کتگ ریاست ھما توار ءِ ایرموش کنگ ءِ جھد ءَ انت ۔
گل ءَ ماھرنگ بلوچ ءِ دزگیری ءِ سرجمیں ھال داتگ ءُ گوشتگ کہ 22 مارچ 2025 ءَ ماھرنگ بلوچ بلوچستان پولیس ءَ تھری ایم پی او ءِ رد ءَ ھما وھد ءَ دزگیر کتگ وھدیکہ آ پرایمنیں نندانک ءِ ھوار بوتگ ۔ اے نندانک ھما زھرشانیانی درچ ءِ بوتگ کہ 21 مارچ ءَ لھتے بلوچ باسکانی دزگیری ءِ بگیری ءَ در اتکگ بوتگ کہ اودا پولیس ءِ تیرگواری ءَ سے مردم بیران ءُ بازین ءِ زدگ بوتگ ۔
آئی ءَ گوشتگ کہ تھری ایم پی او ءِ دزگیری ءِ وھد بس سے ماہ بیت انت کہ آئی ءَ پد ریویو بورڈ ءَ کیس ءِ پیش کنگ المی بیت انت بلے ماھرنگ چار رند ءَ بید ریویو بورڈ ءَ کیس دیما بران بوتگ ۔
گل ءِ رِد ءَ ھشت جولائی ءَ وھدیکہ آئی ءِ کیس بورڈ ءِ دیم ءَ پیش بوگی بوتگ گڈا اناگتی مکدمہ واپس زورگ بوتگ ءُ آ انسداد دہشتگردی آمیدگس ءَ پیش کنگ بوتگ کہ آودا دہ روچ ءِ ریمانڈ ءَ دوبر دزگیر کنگ بوتگ نوں آئی ءِ سرا باگی ءُ ناشرکاری ءِ کیس جنگ بوتگ ۔
ماھرنگ بلوچ ءَ اے بھتام ترندی ءَ گوں ایرجتگ انت ءُ آئی ءِ وکیل ءَ پاکستانی پوج ءِ جارکش ءِ بگیری ءَ شرپ ءِ نوٹس ھم داتگ کہ آئی ءَ پدا دروگیں وتگڑیں درشان داتگ ۔
پین انٹرنیشنل ءِ رد ءَ آ ھما وھد ءَ دزگیر کنگ بوتگ وھدیکہ ناروے ءَ واتر اتکگ بوتگ کہ اودا آ ورلڈ ایکسپریشن فورم ءُ پین ناروے ءِ لوٹارینتگ کہ بلوچستان ءَ انسانی ھکانی جاور ھال ءَ جھان ءَ سر بہ کنت ۔
پین انٹرنیشنل ءَ ماھرنگ بلوچ ءَ ھوار بلوچ یکجھتی کمیٹیءِ رھشونانی یل کنگ ءِ لوٹ کتگ ءُ گوشتگ کہ ماھرنگ بلوچ یک ڈاکٹر ءُ نہ ترسیں نبشتہ کار یے ، کہ آئی ءَ بلوچستان ءَ زالبولانی سرا زلم ءُ زوراکی ءِ سرا کلم چست کتگ ۔
آئی ءَ گڈسر ءَ گوشتگ کہ ڈاکٹر ماھرنگ ءَ جیل ءِ تہ ءَ نمدیانی تہ ءَ نبشتگ کہ پاکستانی ریاست کانودی نزام ءَ رد کارمرد کنگ ءَ انت ءُ آیاں ھاموش کنگ ءِ جھد شرِِیں ودی ءَ درشانتگ انت ۔