گورکوپ : پاکستانی پوج نیمگ ءَ چہ مارٹر آس دیگ بیتگ، دو مردم بیران بیتگ اَنت، ھپت ٹپی

کیچ ءِ دمگ گورکوپ ءَ گوستگیں روچ ءَ بیگاہ ءَ مگرب ءِ وھد ءَ یک تُرندیں تراکے بیتگ، چریشی ءِ آسر ءَ ھپت مردم ٹپی بیتگ اَنت، آیانی تہ ءَ دو مردم سپر ءِ میان ءَ ٹپّانی درد نہ سگ اِتگ ءُ بیران بیتگ اَنت-

دمگی اِھوالکار رِد ءَ تراک ھما وھد ءَ بیتگ کہ وھدے لھتے ورنا دمگ ءَ یک گراؤنڈے ءَ لیب ءَ دلگوش بیتگ اَنت-

ٹپیانی پجّار علی ء غلام، شھباز ء دوستین، نصیر ء محراب، جمیل ء دلمراد، جمال ء حمید، برکت ء اقبال ءُ وزیر ء غلام علی ناماں چہ بیتگ اَنت- سرجمیں مردمانی سیادی یکیں کھول ءَ گوشگ بیگ ءَ اِنت-

ٹپی دوا درمان دیگ ءَ پد سکیں ٹپی ئیں جاوراں چار مردم کراچی ءَ برگ بیتگ اَنت، بلے راہ ءَ دو مردم بیران بیتگ اَنت – دگہ ٹپیانی الاج برجاہ ءَ اِنت-

دمگی اِھوالکار ءَ ٹاہ داتگ کہ اے تراک ءَ یک مارٹر گولے ءِ ترکگ ءَ چہ بیتگ، پاکستانی پوج نیمگ ءَ آس دیگ بیتگ-

دمگی مردمانی گوشگ اِنت کہ پاکستانی پوج ءِ بُنجل ءَ چہ دمگ ءَ بازیں گولھے آس داتگ کہ جتاجتائیں ھندانی سر ءَ کپتگ اَنت-