بلوچستان : بیست ءُ چار کلاکاں پنجاہ ءَ چہ گیش اُرش پورسز، پولیس ءُ شوربندی نشانگ ، بازیں شھراں ناکہ نندی برجاہ

بلوچستان ءَ شپ ءِ وھد ءَ تاں برجاہ سلاہ بندیں اُرشانی درچ برجاہ بلوچستان ءِ سیکورٹی جاور نگیگ کتگ اَنت، جتاجتائیں دمگاں پاکستانی پوج، پولیس، چیک پوسٹ، سرکاری شوربندی، ھال اِھوالی ٹاورز ءُ شوربندی درزنانی اُرشاں نشانگ کتگ اَنت وھدے کہ بازیں دمگاں ناکہ بندی، سنگر گرگ ءُ اُرش کنگ ءُ نگرانی ڈرون ھم تباہ-

اے اُرش نُھ جولائی ءِ شپ بندات ءُ دہ جولائی ءِ شپ ءَ تاں یکشل ءَ برجاہ آیانی تہ ءَ ھاران، کیچ، سبی، جھاؤ، نصیرآباد، ھُزدار، کلات، مستونگ، شال، کوھلو ءُ دگہ دمگ ءَ ھوار اِنت-

بازیں دمگاں انگت ھم سلاہ بندانی ساڑی بیگ ءُ دگانی سر ءَ ناکہ بندی ءِ ھال اِنت-

گیشیں ھالانی رِد ءَ پنجگور ءَ کلم چوک سر ءَ برجاھیں پاکستانی پوج ءِ چوکی سر ءَ سُھب یازدہ ءَ سلاہ بندیں مردماں اُرش کتگ- ھاران ءَ پُشت ماں پُشت سے اُرش بیتگ اود ءَ پاکستانی پوج کارندھاں، ملٹری انٹیلیجنس ءِ کارگس ءَ گواش دگ سر ءَ برجاھیں ایف سی ءِ چوکی اُرشانی نشانگ کتگ اَنت-

سبی کرمو وڈھ، دوسا لاشاری ءُ پھاٹک سر ءَ پولیس چوکی ءَ ھوار ٹول پلازہ نزیک ءَ پوج ءِ چیک پوسٹانی سر ءَ اُرش کنگ بیتگ- جھاؤ نودڑہ کولنج، گزی، داروکوچہ ءُ ڈولیجی ءَ پوجی بُنجل ءُ پوفون ٹاورز اُرشانی نشانگ کتگ اَنت-

کیچ ءِ دمگ گورکوپ، مند، سری گڈگی، بل نگور، نیامی کلگ ، جوسک ءُ تمپ ءِ ھندانی سر ءَ چوکیاں ءُ بُنجلاں نشانگ کنگ ءَ اَنت ءُ بازیں ھندانی سر ءَ ماٹر گولہ آس داتگ-

کلات ءِ دمگ کپوتو ، توک ، مرجان ، منگوچر ءُ دشت گوران ءَ پاکستانی پوج ءِ چیک پوسٹاں ، موباھل ٹاورز ، پوج ءِ گاڑیانی ءُ شوربندیانی سر ءَ اُرش کنگ بیتگ ، شال ءَ سونا خان ، ھزار گنجی ، کرانی دگ سر ءَ چیک پوسٹ نشانگ کتگ اَنت وھدے کہ شال ءَ چہ ھمگرنچیں مستونگ ءِ دمگ دشت ءَ چیک پوسٹاں ءُ سیکریٹریٹ بس سر ءَ اُرش بیتگ-

نصیر آباد ءُ صحبت پور ءَ لوھی ، ساسولی. چھتر ءُ شھنشاہ ءِ ھندانی سر ءَ پولیس چیک پوسٹ نشانگ کنگ بیتگ اَنت – ھُزدار وڈھ پلی مس ءُ دراکالہ ءَ بُنجاھی بُنجل ءُ گرانبھائیں بروکیں گاڑیانی سر ءَ اُرش کتگ-

دالبندین ءَ گیس بروکیں گاڑیانی سر ءَ سلاہ بندیں مردماں اُرش کتگ، بلیدہ ءَ یو بی ایل بینک ءِ ماڑی مانداشتگ اَنت، ھاران ءَ سی پیک کنک دگ ءُ لتاڈ ءَ ایف سی چیک پوسٹ اُرشانی نشانگ کتگ اَنت-

شپ وھد ءَ بندات ءَ اے سلاہ بندیں اُرشاں بازیں جاھانی سر ءَ پاکستانی پوج ءِ کارندھانی بیرانی ءُ ٹپی بیگ ھال اِنت ،وھدے کہ مزنیں کچے مالی تاوان ھم بیتگ ،پوج نیمگ ءَ چہ بُرزی چاروکی واستا ڈرونز ءُ سرویلنس کیمرہ کارمرز کنگ بیتگ اَنت کہ اود ءَ اُرشکاراں نشانگ کتگ ءُ تباہ کتگ اَنت-

بلوچستان ءِ صوبائی ھکومت نیمگ ءَ چہ بازیں دمگاں اُرشانی راست کنان ءَ گوشتگ کہ سیکورٹی جوان کنگ ھاتر ءَ گامگیج کنگ بیگ ءَ اِنت، سیکیورٹی پورسز ءَ بازیں دمگ بند کتگ اَنت ءُ پسھی کاروائی ھم برجاہ-

بلے گُڈی ھالانی رِد ءَ بازیں دمگاں دگانی سر ءَ ناکہ بندی ، اسنیپ چیکنگ ءُ گاڑیانی بندی برجاہ چریشی ءَ شھریاں تُرندیں دلسیاھی دیمپان –

زانگ بہ بیت کہ گوستگیں شپ ءَ بلوچستان لبریشن فرنٹ ” آپریشن بام” جار جتگ اَت گل ءِ جارکش ءَ رسانکدر ءَ شنگ کتگیں کسانیں درشان تہ ءَ گوشتگ کہ کہ اُرشانی درچ برجاہ ءُ سرجمیں ھالاں آپریشن ءِ ھلاسی ءَ پد شنگ کنگ بیت-

ھمے وڑ بلوچ لبریشن آرمی ءِ نیمگ ءَ چہ سوراب ءِ دمگ گدر ءَ پاکستانی پوج ءِ بُنجاھی بُنجل سر ءَ اُرش کتگ ءُ دستیگ کتگ ، دمگ ءَ سر بیوکیں پوج ءِ کاروان دو اُرشاں نشانگ کتگ- بی ایل اے ءِ جارکش جیئند بلوچ رِد ءَ اُرشاں یکجاھی ھساب ءَ ھژدہ پاکستانی کارندہ کشتگ ءُ میڑ ءَ بی ایل اے ءِ سرمچار ھم جنگ بیتگ-