شال ناشرکاری بھتام بُنیاد ءَ بندیگیں بی وائی سی ءِ رھشوناں چہ گند ءَ نند ءِ اجازت دیگ نہ بیتگ اَنت- کھول ءِ نندانک

شال ءَ بلوچ یکجھتی کمیٹی ءِ بُنجاھی رھشونانی دزگیری ءَ سے ماہ سرجم بیتگ، کہ آ 3MPO ءِ بُنیاد ءَ دزگیر کتگ اَنت-

گوستگیں روچ ءَ آ شال ءِ انسداد ناشرکاری آمیدگس ءَ پیش کنگ بیتگ اَنت اود ءَ آمیدگس ءَ دگہ دہ روچ ءِ جسمانی ریمانڈ سر ءَ آ پولیس ءِ دست ءَ دیگ پرمان داتگ-

بی وائی سی رِد ءَ آمیدگسی پیسلہ ءَ پد رھشوناں ھدہ جیل ءَ چہ سول لائنز تھانہ برتگ اَنت بلے برگ ءَ پد چل ھشت کلاک گوزگ ءَ اَبید نہ کھول ءُ ناں وکیلاں آیاں گوں گند ءُ نند ءِ اجازت دیگ بیگ ءَ اِنت-

اے وڑیں کرد ءَ کھول سک پھازی درشان ءَ کنان ءَ تُرس پدر کتگ کہ بندیگیں رھشوناں بندیگی ءِ میان ءَ لَٹ ءُ کُٹ درانسانی رویشگ ءِ دیمپانی کنگ کپ اِیت-

بندیگیں رھشونانی کھول گوستگیں دو روچ ءَ چہ تُرندیں گرم ءَ سول لائنز تھانہ ءِ ڈن ءَ نندانک ءَ نشتگ اَنت زالبول، کماش، ءُ چُک وتی دوستناکانی ھال پُرسی کنگ ءُ کانودی گند ءُ نند آئینی ھک واستا زھرشانی کنگ ءَ اَنت-

کھول ءَ جار جتگ کہ دانکہ آیاں گند ءُ نند ءِ اجازت دیگ بیگ ءَ نہ اِنت آ تھانہ ءِ ڈن ءَ چیدگی شُدکشیں ھڑتال برجاہ ءَ اِنت آیانی گوشگ اِنت کہ گند ءُ نند سر ءَ پابندی آئین، کانود ءُ انسانی ھکانی ھلاپ ورزی اِنت-

کھول ءَ بھتام جتگ کہ اے دردناکیں جاورھال ءِ سرجمیں زمہ واری پولیس، سی ٹی ڈی، دمگی انتزامیہ ءُ ھکومت بلوچستان سر ءَ بیت، کہ پہ زانتی گند ءُ نند ءَ اجازت دیگ ءَ نہ اَنت-

اے میان ءَ پولیس آپسراں کھول گوشتگ اَنت کہ آمیدگس پرمان ءَ اَبید گند ءُ نند ءِ اجازت دات نہ کن آں بلے کھول ءُ کانودی ٹولی آمیدگس پرمان ھم پیش کتگ اَنت اشی ءَ اَبید پولیس گند ءُ نند ءِ اجازت دیگ۔ءَ چہ یکشل انکار کنگ ءَ اِنت-

تاں انو تھنا ڈاکٹر ماہ رنگ بلوچ ءُ بیبو بلوچ ءِ ماتاں کسانیں گند ءُ نند ءِ اجازت دیگ بیتگ، وھدے کہ آ دگہ سرجمیں کھول ءُ وکیلاں چہ زبھر کتگ اَنت-

بی وائی سی ءِ سروک ءَ جار جتگ کہ اگاں گند ءُ نند اجازت دیگ نہ بیت گُڑا سرجمیں بلوچستان ءَ زھرشانی ءِ جار جنگ بیت-

اے جاورھال سر ءَ بلوچ یکجھتی کمیٹی ءِ رھشون ڈاکٹر صبیحہ بلوچ ءَ گْوشتگ کہ ریاستی ادارہ انسانی ھکانی پھازی ءِ ٹاہ ءَ جنت بلے زمینی راستی اے ٹاہ راست نہ اَنت-

بی وائی سی ءَ کڈن کتگ کہ انسانی ھکانی کارکن نشانگ کنگ، کانودی دیگ ءِ بند کنگ، ءُ کھول ءَ گم ءُ درداں دوچار کنگ کبول نہ اِنت- آیاں لوٹ کتگ بندیگیں سرجمیں رھشوناں زوت یل بہ کن اِت آئی ءِ کانودی ءُ انسانی ھک دیگ بہ بیت-

اے میان ءَ کھول نندانک ءِ سوب ءَ سول لائنز تھانہ ءِ ڈن تُرندیں سیکیورٹی ایر کنگ، بیریئرز جتگ اِت، ءُ تھانہ ءِ نیمگاں یکشل ءَ گشت برجاہ-

ھالانی رِد ءَ کھول ءُ پُرایمنیں زھرشانی سر ءَ ریاستی کریک ڈاؤن ءِ تُرس ھم زاھر کنگ بیگ ءَ اِنت چریشی ءَ انسانی ھکانی گل دلپدردناک درشان کنگ ءَ اَنت-

بلوچ یکجھتی کمیٹی ءُ دزگیریں رھشونانی کھول ءَ لوٹ کتگ کہ آ زوت بندیگیں مردمانی پہ سلامتی درگت ءَ سرپدی دیگ بہ بیت گند ءُ نند اجازت دیگ بہ بیت ءُ آیانی سرجمیں آئینی کانودی ھکاں بدے اَنت-