بلوچستان ءَ سیکورٹی جیڑھانی سبب ءَ پاکستان ءَ کوئٹہ ءَ روگ ءُ آیوکیں دراھیں ریل بند کنگ بوتگ انت۔ ریل ءِ انتزامیہ ءِ رد ءَ 10جولائی 2025 ءَ چہ شال ءَ ٹرین ءِ سروس سرجمی ءَ بند بیت انت۔
چہ شال ءَ پشاور جعفر ایکسپریس (39 بُرز) ءُ پشاور شال ٹرین (40 ڈاؤن) ھم وتی رھادگ بوھگ ءِ روچاں بزاں 9 ءُ 10 جولائی ءَ بند بنت۔
ھمے رنگ ءَ چہ شال ءَ کراچی ءَ بولان میل (4 ڈاؤن) ھم 10 جولائی ءَ رھادگ بوت نہ کنت۔
بنشون ءِ رد ءَ فرنٹیئر کور ایف سی ءِ کارندھاں شال ڈویژن برجاھیں سیکورٹی ھترھانی رد ءَ ریل ءِ کاروائی ءَ را یک وھدے ءَ مھتل کنگ ءِ لوٹ کتگ ات۔ اے لوٹ ءِ رد ءَ شال ڈویژن ءَ ریلانی چریشی داں 10جولائی ءَ بند کنگ بوتگ۔
زانگ بہ بیت اے سال ءَ بلوچ لبریشن آرمی ءَ جعفر ایکسپریس ھائی جیک کتگ ءُ دو سد ءَ چہ گیش پاکستانی لشکر ءِ کارندہ الگار کتگ اَنت۔ زندانیانی بدلی ءُ جنگی آپریشن ءِ تہ ءَ گامگیج نہ بوھگ ءِ سوب ءَ بلوچ آجوئی لشکر ءَ سرجمیں کارندہ کشتگ اَنت۔
بی ایل اے مجید بریگیڈ ءِ اے آپریشن دمگ ءَ ریل ھائی کنگ ءِ اولی اِنت۔ اے کارروائیاں بلوچستان ءَ ریلانی روگ ءُ آیگ سک باز تاوان داتگ ۔