بلوچ ورنایانی آوار جنیانی درچ برجاہ، دگہ سَے بیگواھیں مردمانی اھوال دیم ءَ اتکگ انت-
پاکستان ءِ بنجاھی شھر اسلام آباد ءَ پاکستانی لشکر ءَ یک بلوچ نودربرے دزگیر کنگ ءَ پد بیگواہ کتگ-
بیگواھیں ورنا ءِ سعید ء عبید اللہ نام ءَ بوتگ کہ آ قائداعظم یونیورسٹی ءِ بی ایس ڈیفنس اینڈ اسٹریٹجک اسٹڈیز ءِ پنچمی سیمسٹر ءِ نودربر اِنت۔ آ اسلام آباد ٹول پلازا ءَ چہ پاکستانی لشکر ءِ لس پوشاکی کارندھاں آوار جتگ۔
بلوچ اسٹوڈنٹس کونسل اسلام آباد ءَ اے گپ ءِ پدرائی کتگ کہ آئی ءِ بیگواھی اسلام آباد ءَ بلوچ نودربراں نشانگ جوڑ کنگ ءِ زوراکیں بیگواھیانی درچ انت-
آئی ءَ گْوشتگ ما چہ درستیں نودربر، انسانی ھکانی جھدکار، گل ءُ زانتکاریں شھریاں گون دزبندی کن ایں کہ سعید ءِ زوت ءُ سلامتی ءَ واتر بوھگ ءِ ھاترا وتی توار ءَ چست بہ کن اَنت۔
دومی نیمگ ءَ تیابدپی شھر گوادر ءَ اجمان ء امین اللہ نامین کسان سالیں نودربرے پاکستانی پوج ءَ گوستگیں شپ ءِ ساھت نُھ ءَ موسی موڈ ءَ دزگیر کتگ ءُ برتگ-
ھمے وڑ گوادر ءِ دمگ جیونی پنوان ءِ پاکستانی لشکر ءَ سمیر ء عبدالکریم نامیں مردمے گوستگین ھپتگ ءَ آوار جتگ ءُ برتگ- چریشی ءَ پد کھول آئی ءِ یل کنگ ءِ لوٹ ءَ کنگ ءَ انت-