پسنی : بیگواھیں ورنا سراج اسلم ءِ آجوئی ءِ ھاتر ءَ کھول ءِ زھرشانی

بلوچستان ءِ تیاب دپی شھر پسنی ءَ ورنا سراج اسلم ءِ زورانسری آوار جنی ءِ ھلاپ ءَ آئی ءِ کھول نیمگ ءَ چہ زھرشانی کنگ بیتگ-

زھرشانی کنوک پسنی پریس کلب ءِ دیم ءَ برجم دارگ بیتگ، اود ءَ سراج اسلم ءِ کھول دست ءَ پلے کارڈز ءُ بینرز چست کتگ بیتگ آیانی سر ءَ ورنا ءِ اکس ءُ زوت یل کنگ ئے لوٹ نبشتہ بیتگ-

زھرشانی کنوکانی گْوشتگ کہ سراج اسلم پنچ جولائی ءِ شپ ءَ آئی ءِ لوگ ءَ چہ زورانسری آوار جتگ کہ انگت بیگواہ ءَ اِنت آئی ءِ درگت ءَ ھچ وڑیں ھال دز نہ کپتگ-

سراج اسلم ءِ پت محمد اسلم ءَ رسانکدر ءَ گوں نمائندگ ءَ چہ تران کنان ءَ گْوشتگ کہ مئے چُک ناں تھنا بے میارے بلکیں ھچبر درکانودی پُرکاریاں ھمگرنچ نہ بیتگ- آ بے سوب ءَ چہ لوگ ءَ چست کتگ – ما تھنا اے لوٹ ایں کہ آ واتر بئیت-

آیاں گْوشتگ کہ کھول اے وھد ءَ سک زھنی نادُراھی ءِ آماچ اِنت ءُ آ ناں تھنا وتی چُک ءِ سلامتی پکر اِنت بلکیں آئی ءِ انساپ رسگ اُمیت ھم کم بوان اَنت-

زھرشانی کنوکاں واکدار ءَ چہ لوٹ کتگ کہ سراج اسلم ءَ زوت یل بہ کن اِت ءُ آئی ءِ ھلاپ ءَ ھرچ وڑیں بھتامے ھست گُڑا آئی ءَ آمیدگس ء پیش بہ کن اِت-

زھرشانی ءَ ھوار دمگی چاگردی کارکنان ءَ ھم ورنا ءِ بیگواھی ءِ سر ءَ تُرس درشان کتگ-آیانی گوشگ اِنت کہ بلوچستان ءَ زورانسری آوار جنی ءِ جیڑہ بازیں وھدے ءَ ھل ءِ لوٹ اِنت ءُ اشی ءَ چہ ناں تھنا کھول اسرمند اِنت بلکیں چاگردی بے تاھیری گیشی ھم بیگ ءَ اِنت-

زانگ بہ بیت کہ بلوچستان ءَ زورانسری آوار جنی جیڑہ یک ھاسیں جیڑھے بیتگ، آئی ءَ سر ءَ انسانی ھکانی گل ءُ میان استمانی ادراہ توار چست کنگ ءُ آیگ ءَ اَنت-