بلوچ یکجھتی کمیٹی ( بی وائی سی) ءِ بنجاھی رھشون شال ءِ انسداد ناشرکاری ءِ آمیدگس (اے ٹی سی) ءَ پیش کنگ بوتگ انت کہ آمیدگس ءَ آھاناں دگہ دہ روچ ءِ پولیس بندی ءِ پرمان داتگ۔ دزگیریں مردمانی تہ ءَ ڈاکٹر مھرنگ بلوچ، سبگت اللہ شاھجی، بیبگر بلوچ، غفار بلوچ، گلزادی بلوچ ءُ بیبو بلوچ ھوار انت۔
پولیس ءَ آمید گس ءَ گشتگ جرمدارانی سر ءَ ناشرکاری ءِ بھتام ءَ کیس درج کنگ بوتگ کہ ایشی ءِ پٹ ءُ پول ءَ گیشیں وھد ءِ زلورت انت۔ آمیدگس ءَ پولیس ءِ لوٹ ءِ پد ءَ دہ روچ ءِ ریمانڈ ءِ سر ءَ پولیس ءِ دست ءَ داتگ اَنت ۔
زانگ بہ بیت کہ دزگیریں سروک سئے ماہ پیسر 3 ایم پی او (مینٹینس آف پبلک آرڈر) ءِ رد ءَ دزگیر کنگ بوتگ اَنت ءُ اے درگت ءَ مرچی ججانی سر ءَ ھواریں ریویو بورڈ ءِ دیوان ءِ گمان بوتگ۔
بلے دیوان ءَ چہ لھتیں کلاک پیسر اناگہ ءَ ایم پی او ءِ پرمان رد کنگ بوتگ اَنت ءُ آ انسداد ناشرکاری ءِ آمیدگس ءِ دیم ءَ پیش کنگ بوتگ انت۔
بلوچ یکجھتی کمیٹی ءِ سروکانی رد ءَ اے گامگیج “پری پلاننگ” ءِ آسر اِنت کہ سروکاں دروگ ءُ من پندلسازیں کیسانی تہ ءَ ھوار کنگ بہ بیت۔ آئی ءِ گشگ اِنت کہ آئی ءِ ھلاپ ءَ درج کتگیں ایف آئی آر “دروگ ءِ بنیاد ءَ” اَنت ءُ بلوچ سیاسی کارکناں زیر دست کنگ ءُ آیانی توار بندش کنگ ءِ مول ءُ مراد انت-