انسانی ھکانی باسک ءُ بیگواھیں شبیر بلوچ ءِ گْھار سیما بلوچ ءَ وتی تامُربندیں کلوہ ءِ تہ ءَ گْوشتگ کہ آئی ءِ کستریں گْھار ءَ ھوار چار زالبول گوستگیں شپ ءَ پولیس ءَ زورانسری آوار جتگ ءُ ناشناسیں جاھے ءَ برتگ اَنت- سیمہ بلوچ رِد ءَ آ وت ھم زیشان زھیر بلوچ ءِ درکانودی کوش ءِ ھلاپ ءَ بی وائی سی نیمگ ءَ چہ کشگ بیتگیں روانک ءِ بھر بیتگ اَنت ءُ اے میان ءَ پولیس ءِ لَٹ ءُ کُٹانی نشانگ ھم بیتگ اَنت-
آئی ءَ گْوشتگ کہ گوستگیں شپ ءَ چہ دزگیریں زالبولانی درگت ءَ ھچ وڑیں سرپدی دز نہ کپتگ – وھدے کھول ءَ پولیس ءَ چہ ھال کتگ برے گوش اِیت کہ زالبول گڈانی پولیس اسٹیشن ءَ اَنت ءُ برے سرجمی ءَ دزگیری ءَ چہ انکار کتگ-
سیما بلوچ ءَ گْوشتگ کہ پولیس ءِ اے وڑیں درشان کھول ءِ تہ ءَ تُرس ودی کتگ-
آئی ءَ گْوشتگ کہ انسانی ھکانی گلاں، اِھوالکار ءُ سول سوسائٹی ءَ چہ دزبندی کن آں کہ آ اے درگت ءَ توار چست بہ کنت ءُ زالبولاں زوت پہ سلامتی یل کنائینگ ءَ دلجمی دیگ ءِ کرد ءَ پیلو بہ کنت-