بلوچ یکجھتی کمیٹی ءِ رھشون سمی دین بلوچ ءَ وتی شنگ کرتگیں درشان ءِ تہ ءَ گوشتگ کہ گوستگیں روچ ءَ بلوچ یکجھتی کمیٹی ءِ زیشان بلوچ ءِ درکانودی کوش ءِ بگیری ءَ ھب چوکی ءَ ایمنیں زھرشانی ءِ جار جنگ بوتگ ات کہ لسبیلہ پریس کلب ءِ دیم ءَ بوگی بوتگ بلے وھدیکہ درنگاز کنک پریس کلب ءِ دیم ءَ اتکگ انت گڈا پولیس ءُ واکداراں آ زھرشانی کنگ ءَ نہ اشتگ انت گڈا درنگاز کنوکاں وتی زھرشانی ھب ءِ بنجاھی دگ ءَ برتگ بلے اودا ھم پولیس ءَ بیڑ برتگ ءُ آیانی سرا تاکت کارمرز کتگ ۔ اے میان ءَ چار زالبولءُ یک مردین ءِ دزگیر کتگ ، دزگیری ءِ وھد ءَ پولیس ءِ ھمراھی لس پوشاک گوریں مردماں ھمے وھد ءَ تیرگواری ھم کتگ ءُ بازیں درانگاز کنوک ءِ سرا توپک کش اِتگ ۔
آئی ءَ گوشتگ کہ بیست ءُ چار ادارانی گوزگ ءَ پد دزگیر کنگ بوتگیں مردم ناکہ کھول ءَ پیشدارگ بوتگ انت ءُ ناکہ وکیل اشتگ آیانی گور ءَ ءُ پولیس آیانی درگت ءَ چیر دیگ ءَ انت ۔ اے مردمانی درگت ءَ ناکہ ارزی نبشتہ کنگ بوتگ ءُ ناکہ دگہ کانودی کار یے ۔
سمی دین ءَ گوشتگ کہ چار زالبول ءُ مردینے ءَ پنچ مردماں درکانودی بندیگ کنگ ایوک ءَ ریاستی ادارھانی ترس ناں بلکیں کانود رھبند ءُ آجوئی درشان سرا اُرش یے ۔
گڈسر ءَ سمی دین ءَ گوشتگ کہ بلوچ یکجھتی کمیٹی ءِ پرایمنیں زھرشانی ءِ سرا کریک ڈاون ءُ تاکت ءِ کارمرز کنگ اے راستی ءَ پدر کنت کہ ریاست وت یک پرایمنیں ءُ مھکمیں زرمبشے ءَ ترس ایت ۔ یک ھنچیں زرمبش ءِ کہ زوراکی ءِ بگیری ءَ توار چست ءَ انت ءُ اشی ءَ چیر ترینگ وت زوراکی ءَ پدر کنت ۔