شُئیب تو اِشتاپ کُت
نبشتہ کار: لیاقت کے بی
دی بلوچستان پوسٹ
“شُئیب چراگے اَت”
“شُئیب نَدے اَت”
“پہ زھگے ءَ”
“شُئیب جمبرانی شِینکے اَت”
“پہ گریشگ ءِ بھاران”
من اولی رند ءَ شُئیب گنی دو ھزار ءُ دو ءَ ڈریم اکیڈمی کیچ ءَ دیستگ اَت۔ آ ڈریم ءَ وانگ ءَ اَت ما ھم ڈریم ءَ ایڈمیشن زُرت۔ ما ھر وھد ءَ دوچار کپت ایں برے کتاب جاہ ءَ ءُ برے اکیڈمی ءَ۔ اگاں کُجام روچ ءَ ما یکجاہ بوت ایں۔ گڑا شُئیب شرو اَت: پُلاں کتاب ءَ بہ وان اِت، اے کتاب چُش گُش اِیت۔۔۔آ کتاب-
ما ھر کجا شُئیب دیست گُڑا ما کِر ءَ ئِے نہ شت ایں، پرچاکہ آئی ءَ سک باز جُست کُرت، آ وھد ءَ ما کتاب وَ نہ ونت اگاں ونت گڑا مئے ونتگیں کتاب دگر اَت اَنت، مئے ونتگیں کتاباں آئی ءَ گوں ھچ نزدیکی نہ کُت۔ بلے! آئی ءَ ھرجاہ مارا دیست ءُ گُشت ئِے۔ ”کتاب بہ وان اِت، وت ءَ زان اِت۔“ ھمے وڑ ءَ من پد ءَ تُربَت ءَ چہ در اَتک آن ءُ باز وھد ءَ ما دُوچار نہ کپت ایں۔ گڑا چکاسانی وھد ءَ ما مشکے ءَ دُوچار کپت ایں۔
گڑا ما سیڑ ءُ کَشاں گردگ ءَ شُت ایں شُئیب ھم گون اَت آئی ءَ کُجام جاگہ ءَ اگاں شریں پُلے یا ندارگے دیست گُڑا اکس کشگ ءَ اَت۔ گشت ئِے: بلوچستان ءِ وشیں ندارگ مردم ءَ زندگی کنگ پرما اِیت۔ آئی ءَ ھر گپ گوں پدمنتگیں راج ءَ بندوک اَت اَنت۔ آئی ءَ ھر وھد گشت یاررر من گریشگ ءِ نودربراں گند ئے ھاسکر گریشگ ءِ باندات سیاھیں جمبراں گِپتگ۔ اگاں ما گریشگ ءِ نام ءَ گِر ایں گڑا شُئیب اَلم مئے ھیال ءَ کیت پرچا کہ شُئیب مئے سنگتانی تہ ءَ ھما سنگت بوتگ کہ آئی ءَ مارا ھمے سرپد کنگ ءِ جُھد کُرتگ کہ پدمنتگیں راج بے وانگ ءَ دیمروی نہ کنت۔
بلے ھو شُئیب من کہ چیزے نوں زوت ءَ دیستگ کہ سنگتاں لھتیں روچ پیسر گریشگ ءَ یک پروگرامے اڈ داتگ اَت گڑا من ھم ساڑی اَتاں، ءُ من ءَ سنگتاں ھم کتابے دیم ءَ کُرتگ اَت۔ گڑا من یک چیزے چار اِت کہ گریشگ نوں ساری ءِ گریشگ نہ اِنت۔اولی رَند اَت کہ گریشگ ءِ تہ ءَ اِینچو کتاب مردماں پہ وانگ ءِ واستا زرتگ دگہ ھم کِسھے کناں، مئے کر ءَ یک مردمے اَتک پہ کتاب ءِ زورگ ءَ بلے آئی ءَ آ وھد ءَ کلدار گوں نیست اَت۔ گڑا آئی ءَ کتابے دیست گُشت ئِے من اے کتاب ءَ زور آں. ما آ کتاب نہ دات آ داں چار ساھت ءَ مئے کِر ءَ اوشتات پہ کتاب ءِ واستا، گُش اِیت من ءَ کتاب ءَ بہ دے اِت۔ باز مِنت کنگ ءَ پد ما آئی ءَ کتاب دات۔ اے کَسہ ءِ گُشگ ءِ مراد ایش اِنت کہ تئی کِشتگیں نھال بَرکنگ ءَ اَنت۔ نوں گریشگ ءِ سنگت اوں تئی دْروشم ءَ جنگ ءَ اَنت۔ ما ھم پھم اِتگ تو راست بوتگ ئے ما رَد بوتگ ایں۔
اگہ مرچی تو زندگ بوتین ئے، گُڑا تو ھوں گُشتگ اَت کہ گریشگ بدل بوتگ ساری ءِ گریشگ نہ اِنت۔
بھشت تئی ھنکیں بات ”سنگت“
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-