چہ بلوچ اسٹوڈنٹس ایکشن کمیٹی ءِ نیمگ ءَ شال ءَ سائنس فیسٹیولے برجم دارگ بیتگ۔ سائنس فیسٹیول ءِ تہ ءَ بنجاھی کماش ءَ ھوار ایدگہ بنجاھی سنگتاں بھر زُرتگ ءُ ساڑی بیتگ اَنت۔
مراگش ءَ جتا جتائیں سائنسی ءُ زانشتی بھر ہوار بیتگ اَنت چوشکہ سائنس ءُ ٹکنالوجی، فزکس، کیمسٹری، بائیوٹکنالوجی، بائیوکیمسٹری ءِ پڑانی سر ءَ پریزنٹیشن، سائنسی پڑ ءُ سائنس ءُ دومی بساک ءِ ماں سائنسی پِڑ ءَ جھد ءُ بلوچ نودربر ءِ سر ءَ ڈاکیومنٹری پیش دارگ ءُ سائنس ءِ ارزشت ءِ سر ءَ کسمانک ھوار بیتگ اَنت۔
مراگش ءَ سائنسی پِڑانی سر ءَ پنچ پریزنٹیشن پیش کنگ بیتگ کہ چوش اے وڈ بیتگ اَنت، کیمسٹری ءِ سر ءَ جلیل بلوچ، بائیوکیمسٹری ءِ سر ءَ سارہ بلوچ، فزکس ءِ اُزیر بلوچ، بائیوٹکنالوجی ءِ بانک بلوچ ءُ سائنس ءُ ٹکنالوجی ءِ سر ءَ عتیق بلوچ ءَ وتی لکچر پیش کنان ءَ سائنس ءِ پِڑانی پجار، آہانی دپتر ءُ انسانی آسراتی ءَ پہ کارمرزی ءَ ہوار بلوچ ورنایانی ماں سائنسی پِڑاں وانگ ءِ زلورت ءِ سر ءَ تران کُتگ۔
شنگ بیتگیں جار ءَ گوشگ بیتگ دیوان ءَ دو سرھالانی سر ءَ تامربند پیش کنگ بیتگ یکے سائنس، سائنس ءِ پڑ ءُ ھستیں دور ءَ کارمرزی ءُ زلورت ءِ سرھال اَت ءُ دومی بساک ءِ جھد ءُ سائنسی پِڑ ءَ بلوچ نودربر ءُ ورنایانی ھُبناکی ءِ درنگازگ ءِ بابت ءَ بیتگ اَنت۔ اے تامربندانی تہ ءَ سائنسی پِڑ ءُ آہانی ہستیں دور ءَ لوٹ ءُ زلورت ءِ دلجمی ءَ گوں پیش کنگ بیتگ اَنت دانکہ زہگ ءُ ورنا سائنس ءُ سائنسی پِڑاں نا تہنا سرپد بہ بنت بلکیں آہاں بہ وان اَنت ءُ وتی چاگرد ءُ راج ءِ پہ گھتری ءَ کارمرز بہ کن اَنت۔
بساک ءَ گوشت فیسٹیول ءِ مکسد بلوچ زھگ ءُ ورنایانی تہ ءَ سائنسی ھوالہ ءَ ھُبناکی آرگ ءُ آھاں ساچشتی، بودناکی ءُ نوکیں سائنسی سازگاری ءِ تہ ءَ سکین دیگ ءُ راہ پیش دارگ بیتگ دانکہ بلوچ زہگ ءُ ورنا ھکیگیں دروشم ءَ سائنس بہ وان اَنت ءُ وتی بودناکی ءَ چہ نوک نوکیں ساچشت بہ کن اَنت ءُ دنیا ءِ گاماں گوں گام جنگ ءِ تگ ءَ ہوار بہ بنت۔ اے دور ءَ کہ انسان ءَ ہما چیریں راز درگیتکگ ءُ سائنسی پٹ ءُ پول، پریکٹیکل کاراں ءُ آزمودگاں چہ نوک نوکیں ہیال زُرتگ ءُ انچیں ازباب ءُ چیز ساز اِتگ کہ مرچی انسان ءَ پہ وت ءَ ہستیں پُر گنجیں اے دنیا جوڑینتگ۔ انسان ءَ گاراں چہ سپر کنان ءَ مرچی آزمان ءَ وت ءَ سر کُتگ، اے ہمے سائنسی پٹ ءُ پول ءُ جہدانی برورد اِنت کہ انسان ءَ سیاسی، چاگردی، روزیگی، پوجی ءُ ایدگہ پِڑاں دیمروئی کنان ءَ مزن مزنیں کارپد ایر کُتگ۔ دنیا ءَ ہمک راجاں کہ سائنسی زانشت ءِ وسیلہ ءَ چہ وتی جیڑہانی توجیل ساز اِتگ آہاں الم پہ وت راہے گشینتگ ءُ وت ءَ دنیا ءِ تہ ءَ مھکمیں راجے جوڈ کُتگ۔
بساک ءِ جھد اِنت کہ بلوچ زہگ ءُ ورنایانی نہ تھنا سیاسی بلکیں آہانی زانشتی، سیاسی ءُ سائنسی پِڑاں ہیلکاری بہ کنت دانکہ بلوچ ورنا اے دور ءِ دانا تریں ءُ زانتکارتریں ورنا جوڈ بہ بنت ءُ وتی راجی جیڑہانی توجیل ءَ پہ املی پِڑ ءَ جہدے بہ کنت۔
شنگ بیتگیں درشان ءَ گوشگ بیتگ کہ ادارہ جھد کنت کہ سائنسی تک ءَ گیشتر ءُ شرتریں رنگے ءَ کار بہ کنت ءُ اے مراگشاں مستر کنان ءَ ایدگہ ھند ءُ دمگاں برجم بہ دار ایت۔ سائنس فیسٹیول ءَ شال ءِ وانگجاہ، لینگوئج سنٹر ءُ وانگی اکیڈمیاں ہوار ایدگہ زہگ ءُ ورنا ءُ استاداں بھر زُرتگ۔ سرجمیں بھر سوبمندی ءَ گوں برجم دارگ ءَ پد دیوان آسر کنگ بیتگ۔