بلوچ یکجھتی کمیٹی ءِ جار ءِ پد ءَ روانک ءَ بھر زوروکیں زھرشانی کنوکیں مردمانی ھلاپ ءَ خاران پولیس ءَ کیس نبشتہ کتگ ۔
گیشیں اھوالانی رد ءَ پولیس ءَ گوستگیں روچاں خاران ءَ بی وائی سی ءِ نیمگ ءَ زورانسری بیگواہ کنگ ءِ ھلاپ ءَ برجم داشتگیں پرایمنیں ریلی ءِ ھلاپ ءَ ترندیں گامگیج چست کتگ ءُ زالبولیں سروکاں ھوار 13 مردمانی نام گپتگ ءُ ھمے وھد ءَ 60 ءَ بگر داں 70 ناشناسیں مردمانی ھلاپ ءَ ایف آئی آر ھم نبشتگ کتگ انت۔
اے ریلی بی وائی سی ءِ بنجاھی سروکانی زورانسری بیگواہ کنگ ءُ آھانی یل نہ کنگ ءِ ھلاپ ءَ برجم دارگ بوتگ۔ زھرشانی کنوکاں وتی لوٹ امن ءُ ایمنی ءَ پیش داشتگ اَنت بلے پولیس ءَ زور کارمرز کتگ ءُ اے روانک ” گیر کانونی“ لیک اِتگ ءُ ھواریں مردمانی ھلاپ ءَ کیس درج کتگ۔
زانگ بہ بیت کہ بی وائی سی ءِ سروکانی دزگیر کنگ ءِ ھلاپ ءَ بلوچستان ءِ جتا جتائیں دمگاں برجم داشتگیں بے کساسیں پرامن روانک ءُ زھرشانیانی جارچین ءُ بھر زوروکاں پیسر ءَ ھم ایف آئی آر ءُ دگہ ریاستی زورانی آماچ بوتگ اَنت۔