بلوچستان ءِ دمگ کیچ ءِ ھند تمپ ءَ 15 ءُ 16 جون ءِ میانی شپ ءَ سلاہ بندیں مردماں گوں دستی بماں جھمنندیں لوگانی سر ءَ اُرش کتگ ءُ یک جنینے ٹپیگ ءُ لوگ ءِ مال ءُ مڈیاں مزنیں تاوان داتگ۔ دومی نیمگ ءَ پنجگور ءِ ھند چتکان دمگ ءَ دگہ یک اُرشے ءَ تیرگواری ءِ ویل ءَ یک مردمے ھم ٹپیگ بوتگ۔
گیشیں ھالانی رد ءَ گوستگیں شپ ءَ ناشناسیں سلاہ بندیں مردماں تمپ ءِ دمگ کونشکلات ءُ کورجو ءَ درمحمد ءِ زھگ شفیق ءُ محبت ءِ زھگ محمد حیات ءِ لوگ نشانگ جوڑ کتگ اَنت۔ اے اُرش ءَ دستی بمب کارمرز کنگ بوتگ کہ ایشی ءَ چہ لوگانی آپ ءِ ٹینک ءُ اے دگہ سامان تباہ کنگ بوتگ انت۔ اے ویل ءَ نعیمہ نامیں جنینے ٹپی بوتگ ءُ پہ درمان کنگ ءَ نادراھجاہ ءَ سر کنگ بوتگ۔
دومی نیمگ ءَ 13 جون 2025 ءِ شپ 1:30 ساھت ءِ نزیک ءَ ھند پَنجگُور ءِ دمگ چتکان شھر ءَ سلاھبندیں مردماں نسار اھمد ءِ لوگ ءِ سر ءَ اُرش کُتگ۔ اُرش کنوک نسار اھمد ءِ لوگ ءَ پُترتگ ءُ آئی ءَ را زورانسری آوار جنگ ءِ جھد کُتگ، بلے گھگیری کنگ ءَ چہ کلاشنکوپ ءَ تیر گواری ءُ توپک ءِ زوراں گیش ٹپیگ بیتگ۔
اے ویل ءَ پد وھدے کہ زدگیں مردم ءِ کھول ءِ مردماں ویل ءِ بابت ءَ ایف آئی آر درج کنگ ءِ ھاتر ءَ تھانہ ءَ شتگ اَنت گڑا دو جتا جتائیں تھانہ ءَ ایف آئی آر درج کنگ ءَ چہ انکار کتگ۔ پولیس ءِ لیکہ ایش انت کہ “ما ھچ کُت نہ کنیں”۔ دومی روچ ءَ نسار اھمد ءِ کھول ءِ مردم پنجگور ءِ میئر ءِ ھمراھی ءَ تھانہ ءَ شتگ اَنت ءُ ایپ آئی آر نبشتہ کتگ۔
اے اُرشانی تہ ءَ ھواریں مردمانی گْوشگ بیت کہ آ گوں سرکاری کمک ءَ سلاہ بندیں ڈیتھ اسکواڈ ءَ ھمگرنچ اَنت۔
زانگ بہ بیت کہ نوں بلوچستان ءَ “ڈیتھ اسکواڈ” ءِ گالبند رواج انت۔ چہ ڈیتھ اسکواڈ ءِ بزانت ھما سلاہ بندیں گل اَنت کہ آ گیشتر شھری، سیاسی جھدکار، انسانی ھکانی زانوگر یا گھگیر کنوکانی سر ءَ نشانگ جوڑ کن اَنت۔
راجدوستانی اے بابت ءَ ھیال کن انت کہ اے گل نہ ایوک ءَ سرکاری ءُ پوجی ادارھانی رکینگ گون اَنت بلکیں باز براں پولیس ءُ دگہ قانون جوڑ کنوکیں ادارہ ھم چہ آھانی ھلاپ ءَ کارروائی کنگ ءَ دزکشی کن اَنت چوش کہ پنجگور ءِ نسار اھمد ءِ ویل ءَ گندگ بوتگ کہ پولیس ءَ ایف آئی آر درج کنگ ءَ چہ انکار کتگ۔
اے گلانی سر ءَ کُشت ءُ ھون، آوار جنگ، ٹارچر، بمب تراک، ءُ شھریانی ءِ سر ءَ ناشرکاری ءِ وڑیں مزنیں جرم ءِ بھتام انت۔