کیچ ءَ پاکستانی پوج ءِ دست ءَ بیگواھیں مردم ءِ لاش دزکپتگ

بلوچستان ءِ دمگ کیچ ءَ یک ورنایے ءِ لٹ ءُ کٹ کرتگیں لاش دزکپتگ – آئی ءِ پجار واھد ء صوالی نام ءَ زانگ بیتگ کہ آ کیچ ءِ دمگ ناصر آباد ءِ جھمنند انت-

کھول ءِ گوشگ انت کہ آ پاکستانی پوج ءَ بیگواہ کنگ ءَ پد لٹ ءُ کٹانی نشانگ کتگ ءُ پد ءُ کشتگ-

واھد درملک ءَ بیتگ اود ءَ آ مزدوری ءَ بیتگ ھمے زوتاں چہ امارات ءَ واتر اتکگ ءُ دو جون ءَ تربت سول ھسپتال ءَ آوار جتگ ءُ دو روچ ءَ پد چار جون ءَ واھد ءِ لاش ویرانگ ءَ دزکپتگ-

آئی ءِ جسم ءِ سر ءَ سگریٹ ءِ کُشگ ءِ ٹپاں ھوار بازیں نشان پِر انت ءُ آئی ءِ یک چمے کش اتگ ءُ چھرگ ءِ پوست لُڑینتگ –

راجدوست ءُ انسانی ھکانی ادارہ اے درگت ءَ گوشگ ءَ انت بلوچستان ءَ اے دابیں وئیل نوکین نہ انت بلکین یکشل ءَ برجاہ انت-

اے گلانی رد ءَ درزنانی کچ ءَ ورنا زورانسری بیگواہ کنگ بیتگ انت ءُ پد ءَ آیانی لٹ ءُ کُٹ کتگیں لاش ویرانگاں دزکپتگ انت-

گوستگیں لھتے وھداں بلوچستان ءَ زورانسری بیگواہ کنگ بیتگیں مردمانی لاشانی دزکپگ ءَ ترندی اتکگ- آواران، کیچ، کلات، مستونگ ءُ دگہ جاھاں ھمے ھپتگ ءَ بازیں کچے ءَ مردمانی لاش کپتگ انت کہ آ بیگواہ بیتگ انت-