بلوچستان ءِ ھَند واشک ءِ دمگ بیسیمہ ءَ مرچی زھرشانی ءِ درشانی کنگ بوتگ کہ ایشی ءِ تہ ءَ زھرشانی کنوکاں زورانسری بیگواھیں برات ءُ گوھار ماہ جبین ءُ یونس ءِ زوتیں پٹ ءُ پول ءِ لوٹ کتگ۔
اے زھرشانی بیسیمہ ءِ مزنیں چوک ءَ برجم دارگ بوتگ ءُ ایشی ءِ تہ ءَ مزنیں کساسے ءَ جنین آدم، نودربر، پیریں مردم ءُ جتا جتائیں چاگردی گلانی مردماں بھر زرتگ۔
زھرشانی کنوکاں ماہ جبین ءُ یونس ءِ اکس ءُ پلاکارڈ دست ءَ داشتگ اَنت کہ آھانی سر ءَ ”زبردستی بیگواہ کنگ ءَ بند کن اِت“ ءُ ”مئے نزیکیں مردماں بیار اِت“ ھمے جار نبشتگ۔ شریکیں مردماں پاکستانی لشکر ءُ ریاستی پالیسیانی ھلاپ ءَ اوگام ھم جتگ۔
زھرشانی ءِ بابت ءَ ماہ جبین ءُ یونس ءِ گْوھار رُکیہ بلوچ ءَ گوستگیں روچ ءَ وتی یک بیانے ءِ تہ ءَ گُشتگ کہ من وتی برات ءُ گْوھار ءِ زوراکی ءَ بیگواہ کنگ ءِ ھلاپ ءَ زھرشانی کناں۔
آئی ءَ گیش گُشتگ کہ آئی ءِ لوگ بانک سکیں زھنی اذیت ءِ آماچ اِنت ءُ لوٹ کنت کہ اگاں ماہ جبین ءُ یونس ءِ سر ءَ ھرچ وڑیں بُھتام ھست گڑا زوت آمیدگس ءَ آرگ بہ بنت۔
زھرشانی ریلی رَند ءَ دھرنا ءِ دروشم ءَ بدل بوتگ۔ بلے گوں اسسٹنٹ کمشنر ھبیب کاکر ءَ گپ ءُ تران ءَ پد زھرشانی کنوکاں دھرنہ ءِ ھلاس کنگ ءِ پیسلہ کتگ بلے لھتے منّگ نامگ، آیوکیں 24 کلاک ءِ تہ ءَ ماہ جبین ءُ یونس ءِ رکّینگ بہ بیت۔
یک پریس ریلیزے ءِ تہ ءَ سیاد ءُ وارساں گْوشتگ: اگاں اے دوئیں مردم آیوکیں بیست ءُ چار کلاک ءِ تہ ءَ یل کنگ نہ بوت اَنت گُڑا سرجمیں بلوچستان ءَ زھرشانی ءِ زرمبش ءَ بندات کن اِیں۔ بیان ءِ تہ ءَ گیش گشگ بوتگ کہ اگاں ماہ جبین یا یونس ءَ را ھر وڑیں تاوانے رس اِت ایشی ءِ سرجمیں زمہ واری ریاست ءُ ریاستی ادارھانی سر ءَ بیت۔
نودربر ماہ جبین ءَ را چار روچ پیسر شال ءَ چہ ایجنسی ءُ سیکورٹی پورسز ءِ کارندھاں زالبولیں کارندگ ءِ نہ بوگ ءِ سبب ءَ دزگیر کتگ ءُ یونس چہ بیسیمہ ءَ آوار جنگ بوتگ۔ سیاد ءُ وارسانی گشگ انت کہ ماہ جبین ءَ را ناشناسیں جاہ ءَ برگ بوتگ ءُ تاں انوگ ءَ آئی ءِ بابت ءَ ھچ وڑیں ھال ءُ اھوالے مارا تننگا سر نہ بوتگ۔
آماچیں کھول ءَ گوں بلوچ راج ءَ اے گرانیں وھد ءَ گوں آھاں یکجھتی ءِ درشان کنگ ءُ سوشل میڈیا ءَ پہ زور بیگواھی ءِ ھلاپ ءَ توار چست کنگ ءِ دزبندی کرتگ۔
نزیکیں مردمانی گشگ اِنت کہ نوں ریاستی زور ءُ زُلم زالبولاں ھم نشانگ جوڑ کنگ ءَ اِنت کہ اے انسانی ھکانی گرانیں جاور ءِ درشان اِنت۔ آ اے گپ ءَ برجاہ دار اَنت کہ داں ماہ جبین ءُ یونس ءِ رکّینگ ءَ آ وتی جھد ءَ برجاہ دار اَنت۔
زانگ بہ بیت کہ 29 مئی 2025 ءَ شپ ءِ دو بج ءِ نزیک ءَ ماہ جبین بلوچ کوئٹہ ءِ سول نادراھجاہ ءَ چہ پاکستانی پورسز ءُ انٹیلی جنس ادارگاں وتی کبزہ ءَ زرتگ ءُ ناشناسیں جاھے ءَ برتگ۔ پیش ءَ 26 مئی ءَ آئی ءِ برات یونس بلوچ ھم چہ بیسیمہ ءَ آوار جنگ ءَ پد پہ زور بیگواہ کنگ بیتگ۔ انگت ءَ اے دوئیں برات ءُ گوھارانی بابت ءَ سرکاری ھال ءُ اھوال ءُ کانونی گامگیج زورگ نہ بوتگ۔