اگاں ما بہ توار بہ بہ ایں، گُڑا اے مئے پدریچ سر ءَ ھم یک ساپ نہ بیؤکیں داگے یل دیگ بیت – ڈاکٹر صبیحہ بلوچ

بلوچ یکجھتی کمیٹی ءِ بُنجاھی راھشون ڈاکٹر صبیحہ بلوچ ءَ گْوشتگ کہ ریاست گوں مزن دلیری ءَ بلوچ چُکچینی برجاہ داشتگ – آ روچ رُژنایے ءُ شپ تھاری ءَ مئے ورنایاں زورانسری بیگواہ کنگ ءَ اَنت- نو آ کسانیں چُک ءُ زالبولاں ھم زورانسری آوار جنی ءِ نشانگ کنگ ءَ اِنت-

آئی ءَ گوشتگ کہ اے زُلم ءِ بُنکی سبب ءَ مئے بے تواری اِنت – وھدے دُژمن گند اِیت کہ ما تُرس ءِ آماچیں، گُڑ آ گیش بے تُرس بیت ءُ زوراکی ءَ۔گیش کنت-

ڈاکٹر صبیحہ بلوچ ءَ گْوشتگ کہ ما اے راستی منّگ لوٹ اِیت کہ مئے کمک واستا ھچ کس نئیت – وتی پدریچ ءُ وتی مردمانی پھاز ءِ ھاتر ءَ مارا وت دیم ءَ آیگ لوٹ اِیت ءُ توار چست کنگ لوٹ اِیت-

آئی ءَ سرجمیں بلوچاں چہ دزبندی کتگ کہ وھدے آیانی دوستناک بیگواہ کنگ بنت گڑا بے توار مہ بنت- دیم ءَ بیا اَنت، ءُ زُلم ءِ ھلاپ ءَ بہ اوشت اَنت- ما سرجمیں بلوچ راج ءَ چہ دزبندی کن ایں کہ آ اسرمندیں کھولانی ھمراھداری ءَ بہ کن اَنت آیاں ایوک مکن اَنت-

آئی ءَ گْوشتگ کہ باندا بیسیمہ ءَ ماہ جبین بلوچ ءِ یل کنائینگ ءِ واستا یک زھرشانی روانکے کشگ بیت- ما بیسیمہ ءِ راج ءَ چہ دزبندی کن ایں کہ آ اے روانک ءَ جوانیں وڑے ءَ بھر بزور اَنت ءُ بلوچ راج ءَ چہ دزبندی کن آں کہ بیگواھیں مردمانی کھول ءِ گون ءَ یکجاھی ءِ درشان ءَ بہ کن اَنت-

ڈاکٹر صبیحہ بلوچ ءَ گُڈی ءَ گْوشتگ کہ اے زُلم یک لوگے ءِ توک ءَ نہ انت ، بلکیں اے مئے درستانی سر ءَ اسرمند بیتگ – اگاں ما بے توار بہ بہ ایں، گُڑا اے بے تواری آؤکیں پدریچاں ھم یک ساپ نہ بیؤکیں داگے یل دنت-

آئی ءَ گْوشتگ کہ بلوچ راج ءَ چہ دزبندی کن آں کہ آ دیم ءَ بیا اَنت ءُ اے زُلم ءِ ھلاپ ءَ توار چست بہ کن اَنت-