کیچ ءُ پنجگور ءَ پاکستانی پوج ءُ ڈیتھ اسکواڈ کارندھانی دست ءَ چار مردم آوار جنگ ءُ بیگواہ کنگ بیتگ اَنت

بلوچستان ءِ دمگ کیچ ءُ پنجگور ءَ پاکستانی پوج ءُ ڈیتھ اسکواڈ کارندھانی دست ءَ سے مردم آوار جنگ ءُ بیگواہ کنگ بوتگ اَنت-

گیشیں ھالانی رِد ءَ کیچ ءِ دمگ تمپ ملک آباد ءَ پاکستانی پوج ءَ گوستگیں شپ ءَ بیڑبرتگ ءُ دو ورنا آوار جتگ ءُ بیگواہ کتگ اَنت-

ھالانی رِد ءَ آوار جنگ بیتگیں مردمانی پجّار دلیپ ء رفیق ءُ بلال ء باقی ناماں چہ بیتگ اَنت-

ھمے وڑ چہ پنجگور ءَ پاکستانی پوج ءُ ڈیتھ اسکواڈ کارندھاں لوگانی سر ءَ بیڑبرتگ ءُ یک ورنایے آوار جتگ-

ھالانی رِد ءَ پنجگور ءِ دمگ چہ چتکان پاکستانی پوج ءُ ڈیتھ اسکواڈ کارندھاں بیست نُھ مئی دوھزار بیست پنچ ءِ شپ ساھت چار ءَ لوگانی سر ءَ بیڑبرتگ پروم جائین نعیم آباد ءِ جھمنند نواب ء عبداللہ آوار جتگ ءُ وتی ھمراھی ءَ برتگ گوں-

ھمے وڑ بیست شش مئی دوھزار بیست پنچ ءِ شپ ءَ پوج ءَ پنجگور دمگ راھی نگور چہ یک ورنایے آوار جتگ ءُ بیگواہ کتگ-

آوار جنگ بیتگیں ورنا ءِ پجّار چنگیز بلوچ نام ءَ چہ بیتگ کھول ءَ چنگیز بلوچ ءِ زورانسری آوار جنی راست کتگ گْوشتگ کہ آ سک دلسیاہ اَنت ءُ آیانی گوشگ اِنت چنگیز کجام وڑیں آمیدگسی کاروائی ءَ اَبید درکانودی ھساب ءَ بیگواہ کنگ کہ بُنکی انسانی ھکانی سنگین ءِ ھلاپ ورزی اِنت-

زانگ بہ بیت بلوچستان ءَ ھمکروچ زورانسری آوار جنیانی وئیل دیم ءَ آیگ ءَ اَنت یک نیمگے دروگیں میڑاں بیگواھیں مردمانی کُشگ ءُ دور دیگ بیگ ءَ اَنت-

بلوچستان ءَ زورانسری آوار جنی ءِ وئیل سر ءَ انسانی ھکانی گل یکشل ءَ تُرس درشان کنگ اَنت- دمگی ءُ میان استمانی ادارہ لوٹ کنگ ءُ آیگ ءَ اَنت کہ بیگواھیں مردمانی جیڑہ گوں جوانیں وڑے ءَ بہ گشین اِت ءُ زورانسری آوار جنی ءِ دْرچ ءَ بند بہ کن اِت-