کراچی ءِ میتگ ماری پور چہ ٹیکری ولیج ءَ دو ھکّیگیں برات شیراز بلوچ ءُ سیلان بلوچ ءِ کھول ءَ زورانسری بیگواہ کنگ ءِ سر ءَ سک باز زھرشانی کتگ ءُ گْوشتگ کہ اے دوئیں ورنا 23 مئی 2025 ءِ شپ ءَ سی ٹی ڈی ءِ کارندھانی دست ءَ ناجائزیں وڑے ءَ دزگیر کنگ بوتگ اَنت ءُ آ انگت بیگواہ اَنت۔
سے شمبے ءِ روچ ءَ کراچی پریس کلب ءَ تران کنان ءَ دوئیں براتانی گوھار گل سدا بلوچ ءَ گْوشتگ کہ شیراز بلوچ ءِ پاد ءَ راڑے مان، آئی ءِ دو براں آپریشن بوتگ وھدے کہ سیمی بَرّ ءُ برین پشتکپتگ، بلے آ چہ دارو ءُ درمان ءِ آسراتیاں زِبھر انت، آئی ءِ گُشگ اَت کہ دوئیں برات مزدور اَنت آ چہ مزوری کنگ ءَ اَبید دگہ ھچ چیز ءَ سیادی نہ دار اَنت ءُ چہ روچ ءِ پگار ءَ لوگ ءِ وردن ءَ زند ءَ تیلانک دے اَنت۔
گل سدا ءَ جُست ایر کُتگ کہ اگاں آئی ءِ براتاں انچیں بُھتامے ھست گڑا آمیدگس ءَ پیش کنگ بہ بنت، بلے اے وڑ ءَ زورانسری گار ءُ بیگواہ کنگ دگہ چشیں جمھوری ءُ کانودیں چاگردے ءَ منّگ نہ بیت۔ آئی ءَ گُشت، ” مارا ناں چُشیں دزگیری ءِ نوٹس دیگ بیتگ، نیکہ چہ آمیدگس ءَ گوانک پِر جَنَگ بوتگ۔ ما سک ءَ پریشان ءُ تُرس ءِ آماچ اِیں۔
آئی ءَ مزن راجکار، آمیدگس، انسانی ھکّانی ادارھاں ءُ چہ سول سوسائٹی دزبندی کُتگ کہ آئی ءِ براتانی یل کنائینگ ءَ گیش ءَ چہ گیش مئے ھمکوپگ ءُ ھمگام بہ بنت تاکہ ھاندان چہ آسودگیں زندے گوازینت کُت بکنت۔ آئی ءِ گُشگ اَت کہ آ چہ پُر ایمنی ءَ وتی کانونی ھک ءِ واستا توار ءَ چست کنگ ءَ اِنت ءُ اُمیت کنیں کہ آئی ءَ انساپ بہ رس اِیت۔
پریس کانپرنس ءَ دگہ گار ءُ بیگواھیں کھول ھم ساڑی بوتگ اَنت ءُ چہ انسانی ھکانی گلاں لوٹ کُتگ کہ آ اے یکشلیں زُلم ءُ زوراکیانی ھلاپ ءَ توار بُرز تر بکن اَنت ءُ ھکومتی ادارھانی سر ءَ زور داتگ کہ دوئیں براتانی یل کنائینگ ءَ زوت ءَ چہ زوت بکن اَنت