بلوچستان ءِ دمگ آواران ءِ ھند مالار مچی ءَ گوستگیں شپ ءَ چہ پاکستانی لشکر ءِ تیر گواری ءَ دو مردم بیران ءُ یک جنینے سک ٹپیگ بوتگ۔
دمگی مردمانی رد ءَ یک بج ءِ نزیک ءَ لشکر ءَ بازیں لوگانی سر ءَ اُرش کتگ ءُ وھدے کہ مردماں گھگیری کنگ ءِ جھد کتگ گڑا لشکر ءَ کورکائی تیرگواری کتگ۔ تیرگواری ءِ آسر ءَ سنجر بلوچ ءِ ورنائیں بچ نعیم بلوچ ءُ نیم اُمریں زالبول ھوری بنت قاسم ھما جاہ ءَ بیران بوتگ انت ءُ نعیم بلوچ ءِ مات دادی بلوچ سک ٹپیگ بوتگ۔
چہ دمگی مردمانی رد ءَ ٹپیگیں جنین آدم سرجمیں شپ ءَ چہ دوا ءُ درمان ءِ آسراتی ءَ زبھر بوتگ ءُ دومی روچ ءِ سھب ءَ آواران ءِ نادراھجاہ ءَ دیم دیگ بوتگ ءُ آئی ءِ جاور ھال نگیگ اَنت۔
زانگ بہ بیت کہ اے وئیل گوستگیں ھپتگ ءِ تہ ءَ آواران ءِ دمگ مالار ءَ بوتگیں چارمی وئیل اِنت۔ آواران ءَ یک ھپتگے ءِ تہ ءَ پاکستانی لشکر ءِ دست ءَ کم چہ کم پنچ مردم وتی ساھاں زبھر بیتگ انت۔