بی وائی سی ءِ نیمگ ءَ بلوچستان ءِ جتاجتائیں دمگاں زھرشانی ءُ روانکانی درچ برجاہ انت-
بلوچ یکجھتی کمیٹی مکران ءِ دمگ کیچ ءِ جتا جتائیں دمگاں در کانودی کوش ءُ زورانسری بیگواھی وئیلانی گیشی ءُ ڈاکٹر ماہ رنگ ءَ ھوار گل ءِ سروکانی درکانودی بندیگ کنگ ءِ ھلاپ ءَ روانک کشگ بیتگ انت۔
بلوچ یکجھتی کمیٹی ءِ نیمگ ءَ زھرشانی ءِ جنبش ءِ جار ءَ چہ پد بلوچستان ءِ جتاجتائیں دمگاں زھرشانی ءُ مچی برجم دارگ بوتگ اَنت ھمے وڑ گْوستگیں روچ ءَ بلیدہ ءُ تمپ ءَ شھر ءِ مزنیں کچے ءَ مھلوک ءَ روانک کش اتگ انت۔
بلیدہ ءُ تمپ ءَ برجم داشتگیں زھرشانی ءَ بھر زوروکاں بلوچستان ءَ زورانسری بیگواہ کنگ ، دروگیں انکاؤنٹر ءَ بیگواھیں مردمانی کُشگ ءُ بی وائی سی ءِ سروکانی نیمگ ءَ سیاسی بدلی ءِ ھلاسی ءِ لوٹ کتگ۔
یات بہ بیت کہ بلوچ یکھئی کمیٹی ءَ مئی ءَ بگر داں 27 مئی ءَ بلوچستان ءِ جتاجتائیں دمگاں زھرشانی ءِ گوانک جتگ ات کہ ایشی ءِ چیر دستی ءَ شال، مستونگ، حب، خاران، نوشکی، دالبندین، خضدار ءَ ھوار جتاجتائیں دمگاں جلسہ کنگ بوتگ انت۔
گل ءِ رد ءَ اے زھرشانی بی وائی سی ءِ گیشتریں زھرشانی مھم ءِ بھر اَنت کہ ایشی ءِ مول ءُ مراد بلوچستان ءَ برجاھیں ریاستی زُلم ءُ زوراکیانی ھلاپ ءَ لس مھلوک ءَ سرپدی دیگ اِنت کہ ایشی ءِ تہ ءَ زورانسری بیگواہ کنگ ءُ درکانودی کُشگ ھوار اَنت۔
گیش بی وائی سی ءَ اے گپ پدر کتگ کہ آھانی پرامن زھرشانی ءِ جنبش ھما وھد ءَ برجاہ بیت داں کہ زورانسری بیگواھیں مردم یل دیگ نہ بنت، دزگیریں سروکاں انساپ دیگ مہ بیت ءُ بلوچستان ءَ سرکاری ادارھانی زوراکی ھلاس نہ بیت انت-