بلوچستان ءِ دمگ بارکھان ھند تنگ کریر ءَ سی ٹی ڈی ءَ گمانی ءَ دیم پہ دیم بوگ ءَ پد مرچی سھب ءَ سئے لاش رکنی ءِ بی ایچ یو نادراھجاہ ءَ سر کتگ اَنت کہ آھانی پجار ھما مردمانی بوتگ کہ آ زورانسری بیگواہ کنگ بوتگ اَنت۔
لاشانی پجار عبدالرحمان بزدار ء فیض محمد بزدار جھمنند راڑہ شم، فرید بزدار ءِ رحیم بزدار جھمنند راڑہ شم ءُ سلطان مری ءِ عیدو مری ءِ نام ءَ زانگ بوتگ اَنت۔
دمگی مردمانی رد ءَ اے سئیں مرد چہ بازیں ماھاں بیگواہ بیتگ انت-
سی ٹی ڈی ءِ جارکش ءِ رد ءَ بارکھان ءِ دمگ تنگ کریر ءَ آپریشن ءِ وھد ءَ گوں سلاہ بندیں مردماں تیرگواری بوتگ کہ ایشی ءِ تہ ءَ سَے مردم بیران بوتگ اَنت ءُ آیانی دگہ ھمراہ چہ ھما جاہ ءَ درکپتگ اَنت۔ جارکش ءَ ٹاپار جتگ کہ بیران بوتگیں مردمانی گور ءَ دو کلاشنکوپ، یک پستول ءُ دو تیاریں بمب دزکپتگ انت ءُ ایشانی سیادی یک ناشریں گلے ءَ بیتگ-
بلے کھول ءُ بلوچ پھناتانی گشگ اِنت کہ اے دروگیں انکاؤنٹر اِنت، کہ ایشی ءِ تہ ءَ پیسر ءَ زورانسری بیگواھیں مردم کُشگ بوتگ اَنت۔
اے وئیل بلوچستان ءَ اولی وئیل نہ انت ۔ گوستگیں وھداں سی ٹی ڈی ءِ سر ءَ بازیں بھتام جنگ بیتگ کہ دروگیں میڑانی تہ ءَ زورانسری بیگواہ کنگ بیتگیں مردماں کُشگ انت-
گوستگیں ماھانی تہ ءَ بلوچستان ءَ اے وڑیں وئیل گیش بوتگ انت کہ آھانی تہ ءَ “انکاؤنٹر” ءَ پد بیگواھیں مردمانی لاش دست کپتگ انت۔ راجدوست ریاستی ادارھانی سر ءَ بھتام جن انت۔ بلوچستان ءَ چہ آمیدگساں دریں کشتار، زوراکی ءَ بیگواہ کنگ ءُ دروگیں انکاؤنٹر ءِ دود ءُ ربیدگ جوڑ بوتگ اَنت۔
اے سال ءِ 19 اپریل ءَ انسداد ناشرکاری ءِ مھکمہ ءَ ٹاپار جتگ کہ آیان دکی ءَ آپریشن ءِ وھد ءَ 5 مردم کُشتگ انت۔ بلے اے بیران بوتگیں مردم رند ءَ زورانسری بیگواہ کنگ بیتگیں مردمانی ناماں پجار کنگ بوتگ اَنت۔
ایشی ءَ چہ پیسر سی ٹی ڈی ءَ شال ءِ دمگ دارخشان ءَ بوتگیں گمانی دیم پہ دیمی میڑ ءَ دو مردمانی کُشگ ءِ جار جتگ ات۔ ھمے رنگ ءَ زیارت ءِ دمگ چوتیر ءَ سی ٹی ڈی ءُ دگہ کانود ساز کنوکیں ادارگاں یکجائی آپریشن ءِ وھد ءَ گوں سلاہ بندیں مردماں تیرگواری ءِ تہ ءَ 7 مردمانی کُشگ ڈاھینتگ کہ رند ءَ اے درست دروگیں انکاؤنٹر بوتگ اَنت کہ ایشی ءِ تہ ءَ پیسر ءَ بیگواھیں مردم کشگ بیتگ انت-