داعش خراسان ءَ بلوچ آجوئی لوٹوکیں سلاہ بندیں گلانی بگیری ءَ جنگ ءِ جار جتگ

داعش خراسان ( آئی ایس کے پی) ءَ وتی نوکیں تامر ءِ تہ ءَ آجوئی لوٹوکیں سلاہ بندیں گلانی بگیری ءَ جنگ ءِ جار جتگ –
داعش خراسان ءِ نیمگ ءَ اے تامر پشتو زبان ءِ تہ انت کہ آئی ءِ تہ ءَ بلوچ سلاہ بندیں گل تنکید ءِ نشانگ کتگ انت ءُ بیھار داتگ انت کہ شمے سرا اُرش کن ایں –

تامر ءِ تہ ءَ داعش ءَ بھتام جتگ کہ دو ماہ ساری بلوچ سلاہ بندیں جنگولاں مستونگ ءَ مئے اوتاک ءِ سرا اُرش کتگ، داعش ءَ گوشتگ کہ نون بلوچ سلاہ بندیں گلانی بگیری ءَ ھما ترندی ءَ گوں کار کنگ بیت کہ اوگان ءَ تالبانانی بگیری ءَ کتگ –

تامر ءِ گڈسر ءَ داعش خراسان ءَ لس مھلوک ھاسکر بیگواھیں مردمانی کھول مکن کُتگ ءُ گوشتگ انت کہ نوں آ بلوچ ھکانی زھرشانی یا روانکاں بھر مہ زور انت پرچاکہ نوں اے مُچی داعش ءِ ٹارگٹ ءِ تہ ءَ انت –

اے بیھار ءَ چہ ھمے تُرس انت کہ باندات ءَ اے زھرشانیانی سرا وتکُش یا دگہ اُرش کنگ بنت، تامر ءِ تہ ءَ داعش ءَ بلوچ آجوئی لوٹوکیں سلاہ بندیں ٹولی سیکولر راجدوست گوشتگ انت ءُ آیانی سرا اسلامی اقدار ءِ بگیری ءِ بھتام جتگ –

آئی ءَ ٹاہ داتگ کہ اگاں بلوچ جنگول ءُ داعش ھردو یکیں کوھاں بوتگ ءُ پاکستان بگیری ءَ کار ءِ کتگ بلے بلوچ گلاں یک نیمگ بوتگ ءُ داعش ءِ سرا اُرش کُتگ کہ اشی ءِ پسو ءَ داعش الم دنت –

تامر ءِ تہ ءَ داعش خراسان ءَ وتی جنگول گوشتگ انت کہ آ بلوچ گل ءُ آیانی پلامرزانی بگیری ءَ ترندی ءَ گوں کار بہ کن انت ءُ وتکش تراک ھم بہ کن انت – تامر ءِ تہ ءَ ھاسکر بلوچ لبریشن آرمی، بلوچستان لبریشن پرنٹ ءُ آیانی ھم سنتانی نام گرگ بوتگ –

تامر ءِ تہ ءَ بازیں بلوچ انسانی ھکانی گلانی روانک ءُ بیگواھیں مردمانی کھولانی اکس ھم زاھر کنگ بوتگ انت کہ داعش آیاں آجوئی لوٹوکیں گلانی پلامرز گوشگ ءُ بیھار دیگ ءَ انت چہ اے گپاں ھمے زاھر بیت کہ نوں داعش تچکی ءَ انسانی ھکانی باسک ءُ ایردستیں کھولاں نشانگ کت کنت –

اگاں داعش خراسان ءِ بلوچستان ءِ تہ ءَ مھکمیں اوتاک یا راجی پلامرزی گندگ ءَ نہ ایت بلے بازیں تجزیہ جنوک ءُ انسانی ھکانی ادارھانی گوشگ انت کہ پاکستانی اسٹبلشمنٹ چیریں وڈی ءَ داعش ءَ بلوچ گھگیری زرمبشانی بگیری ءَ کارمرز کنگ ءَ انت –

بلوچستان ءِ تہ ءَ داعش کہ پدا رند ءَ داعش خراسان بازیں وھدے بیت ترک ءُ وتکشیں تراک کنگ ءَ بوتگ وھدیکہ جھانی ناشرکاریں مزھبی گل ءِ نیمگ ےَ مستونگ ءَ پولیس گاڑی ءَ نشانگ کنگ ءِ وھد ءَ اسکول بس ءِ سرا ءِ بوتگیں اُرش ءِ زمہ واری منّ اِتگ بوتگ –

بلوچستان ءِ تہ ءَ داعش ءِ گیشتریں کار پشتون دمگاں کنگ بوتگ انت وھدیکہ داعش ءَ اے اُرشانی تہ ءَ مزھبی سیاسی پاٹی آیانی رھشون نشانگ کتگ انت وھدیکہ اشی ءَ پد مستونگ ءَ اے ٹولی ءِ ارشانی بنجاہ بوتگ کہ اودا بازیں وتکُش تراکانی زمہ واری ھمے گل ءَ منّ اِتگ انت –

زانگ بہ بیت میان استمانی ادارھانی ھمراھی ءَ بلوچ آجوئی لوٹوکیں گلاں ھما بندات ءَ پاکستانی پوج ءِ سرا ھمے الزام جتگ کہ آ بلوچستان ءِ تہ ءَ داعش ءَ کار گرگ ءُ بلوچ آجوئی لوٹوکیں گلانی بگیری ءَ کارمرز کنگ ءَ انت وھدیکہ پاکستان ءِ ھمساھگیں ڈیھاں ھم پاکستانی استبلشمنٹ ءِ سرا ھمے الزام مدامی جتگ –

ھمساھگیں ڈیھ ایران ءُ اوگانستان ءَ باز براں پاکستان ءِ سرا ھمے الزام جتگ کہ آ داعش ءِ نیٹورک ءَ پناہ دنت، گوستگیں سال ءَ ایران ءِ شھر شیراز ءَ بوتگیں اُرش ءِ زمہ واری داعش ءَ منّ اِتگ ات ءُ ایرانی سرکار ءِ گوشگ ات کہ اُرشکاراں پاکستان ءِ زمین کارمرز کتگ –

ھمے وڈ کابل ءِ سرکار ءَ باز براں ھمے الزام جتگ کہ داعش چہ پاکستان ءَ اوگانستان ءُ سرکاری کارمندانی سرا اُرش کتگ –

تنی وھدی بلوچ لبریشن آرمی، بلوچستان لبریشن پرنٹ یا دگہ سلاہ بندیں گلاں داعش ءِ اے جنگ ءِ جار ءِ درگت ءَ تنی وھدی ھچ وڈیں درشان نہ داتگ، دانشورانی گوشگ انت کہ دیمتر ءَ جاور ھال ھرابتر بوت کناں –