زرمبش ٹی وی ءِ اولی پرومو شنگ بوتگ

زرمبش رسانک ءِ رِد ءَ ادارہ ءَ نوکیں بزاں ڈیجیٹل اسٹیڈیو بندات کُتگ ءُ پرومو شنگ کتگ – پرومو ءِ رِد ءَ زرمبش نوں سرجمی ءَ ڈجیٹل اسٹیڈیو دروشم ءَ اتکگ، کہ اودا بلوچی ءِ تہ ءَ ھال ءُ دگہ مراگش کنگ بنت –

زرمبش ءِ رِد ءَ بنداتی جار مھناز بلوچ ءَ جتگ کہ آ اے پلیٹ فارم ءِ اولی نیوز پریزنٹر ایں –

زرمبش رِد ءَ آیاں سَے روچ ساری اے بدلی ءِ جار جتگ بوتگ، پرومو ءِ شنگ کنان ءَ زرمبش ءِ ڈائریکٹر دلمراد بلوچ ءَ گوشتگ کہ درسیں بلوچ ءُ دوزواھاں چہ لوٹ کن ایں کہ آ چاگردی ترامجاہ ءَ مئء اے نوکیں سپر ءَ مئے کمکءُ رھشونی ءَ بہ کن انت –

آئی ءَ گوشتگ کہ بازیں سنگتاں ھمے جست کتگ کہ ریڈیو زرمبش ءِ یوٹیوب چینل ءَ کہ آئی ءَ لک ءَ گیش سبکرائیبراں آ پرچا کارمرز کنگ بوگ ءَ نہ ایں – اے درگت ءَ من ھمے گُشاں کہ آ چینل ءَ ھمینچو باز رپورٹس کنگ بوتگ انت کہ آئی ءِ سرا نوں اوست کنگ نہ بیت –

آئی ءَ گوشتگ کہ ھمے سوب ءَ زرمبش اے سپر یک نوکیں یوٹیوب چینل ءَ چہ بندات کنگ بوگ ءَ انت – مارا باور ایں کہ زرمبش ءِ لوٹوک ءُ راجدوستیں مردم اے نوکیں پلیٹ فارم ءَ ھمینچو شاھگان کن انت کہ لھتے روچانی تہ ءَ بلوچ ءِ توار دور دور ءَ تاں اشکُنگ بیت –