ڈاکٹر صبیحہ بلوچ ءِ پِت ءِ زورانسری بیگواھی ءَ ماھے سرجم ، دزگیری یا دزکشی ءِ شرت، پت ءِ کُشگ ءِ بیھار

بلوچ یکجھتی کمیٹی ءِ رھشون ڈاکٹر صبیحہ بلوچ ءِ پت ءَ زورانسری بیگواھی ءَ یک ماھے ءَ چہ گیش بیتگ، پاکستانی چیریں ادارھانی کارندھانی نیمگ ءَ چہ صبیحہ بلوچ ءِ دزگیری دیگ یا چہ بی وائی سی ءَ دزکشی ءِ شرت ایر کتگ اَنت-

بی وائی سی ءِ رھشون ءِ پت میر بیشر احمد چہ پنچ اپریل ءَ زورانسری بیگواہ کنگ بیتگ- رسانکدر ءَ شنگ کتگیں درشان ءِ تہ ءَ ڈاکٹر صبیحہ بلوچ ءَ گْوشتگ کہ منی پت ءَ ھچ چُشیں جرمے اناں بلکیں منی سیاسی گپانی بنیاد ءَ چست کتگ ءُ اے کانود ءِ ایر کنگ نہ اِنت بلکیں سیاسی چمپروشی اِنت-

اِھوالکار ءَ ٹی بی پی ءَ گْوشتگ کہ صبیحہ بلوچ ءِ پت پاکستانی چیریں ادارھانی کارندھانی دست ءَ اِنت – کارندھانی نیمگ ءَ چہ کھول ءِ نیمگ ءَ چہ گوشگ بیتگ صبیحہ بلوچ دزگیری بہ دنت یا چہ بلوچ یکجھتی کمیٹی ءَ دزکش بہ بیت-

پاکستانی چیریں ادارھانی نیمگ ءَ چہ میر بشیر احمد ءِ کشگ ءَ ھوار کھول ءِ آ دگہ مردماں زورانسری بیگواہ کنگ ءِ بیھار داتگ-

جنیوا ءِ اکوام متھدہ ءِ انسانی ھکانی پھازکاری ءِ ھاسیں نمائندگ میری لاولر ءَ ڈاکٹر صبیحہ بلوچ ءِ ھلاپ ءَ کاروائی ءِ سر ءَ دلپدردی درشان کتگ-

وتی یک درشانے ءِ تہ ءَ میری لاولر ءَ گْوشتگ کہ آئی ءَ ھال سر بیتگ کہ ڈاکٹر صبیحہ بلوچ ءَ پاکستان کجام وھد ءَ دزگیر کت کنت، وھدے کہ واکدار ءَ آئی ءِ انسانی ھکانی کار کنگ ءِ بدل ءَ آئی ءِ پت ھم انتکامی کاروائی ءِ دروشم ءَ دزگیر کتگ-

میری لاولر ءَ لوٹ کتگ کہ بلوچستان ءِ واکدار زوت صبیحہ بلوچ ءِ ھلاپ ریاستی انتکامی کاروائیاں بند بہ کنت ءُ آئی ءَ انسانی ھکانی پھاز ، رکینگ ءُ دیمروئی ءِ ھاتر ءَ آجوئیں ھساب ءَ کار کنگ ءِ موکل دیگ بہ بیت-

زانگ بہ بیت بلوچ یکجھتی کمیٹی ءِ رھشون ڈاکٹر ماہ رنگ بلوچ، بیبگر بلوچ بندیگجاہ ءَ بندیگ کتگ اَنت وھدے کہ سمی دین بلوچ کراچی ءَ لَٹ ءُ کُٹ کنگ ءَ پد دزگیر کتگ اَت-

بی وائی سی ءِ باسک بیبو بلوچ ءُ گل زادی بلوچ ھم بندیگجاہ ءَ بندیگ کتگ اَنت وھدے کہ کراچی ءُ ھب ءَ پُرکاریں باسک فوزیہ بلوچ ءُ ماہ زیب بلوچ زورانسری بیگواہ کنگ ءَ بیست ءُ چار ادار ءَ پد یل کتگ اَنت-