بلوچستان ءِ دمگ بولان ءَ بمب تراکے ءَ پاکستانی لشکر ءِ شش کارمند بیران ءُ پنچ ٹپیگ بوتگ اَنت۔
اھوالانی رد ءَ تراک بولان گیشتری دمگ ءَ ھما وھد ءَ بوتگ کہ فوج ءِ گاڑی امیر پوسٹ ءُ علی خان بیس ءِ میان ءَ سڑک ءِ سر ءَ روگ ءَ بوتگ۔ بیران ءُ ٹپیانی تہ ءَ اسپیشل آپریشن ءِ کمانڈر ھم ھوار اِنت۔
بیران بوتگیں کارندھانی پجار اسپیشل آپریشن کمانڈر طارق عمران، نائیک آصف، سوبیدار فاروق، نائیک مشکور، سپاہی واجد ءُ سپاہی کاشف ءِ نام ءَ زانگ بوتگ انت۔ اے کارندھانی تہ ءَ پنچ کارندہ یونٹ 135 ڈبلیو ءِ بوتگ انت۔
تراک ءِ تہ ءَ ٹپی بوتگیں کارندھنی تہ ءَ سپاھی زیشان، سپاھی شادمان، نائیک اویس (یونٹ 135 ڈبلیو) ھوار اَنت ءُ سپاجی زین اللہ ءُ سپاھی طیب کہ چہ اسپیشل آپریشن کمانڈ ءَ سیادی دار اَنت ٹپیگ بوتگ اَنت۔
اے وئیل ءَ پد سیکورٹی لشکر ءَ دمگ انگیر کتگ ءُ پٹ ءُ پول ءِ کارروائی بندات کتگ ءُ دمگ ءَ 5 بالی گراب بال ءَ گندگ بوتگ انت۔
بلوچستان ءَ پاکستانی لشکر ءَ پیسر ءَ ھم آجوئی لوٹوکیں گلانی نیمگ ءَ اُرشانی دیمپانی بوتگ کہ ایشی ءِ تہ ءَ درزنانی کارندہ بیران بوتگ اَنت۔ انگت ءَ کس ءَ اے اُرش ءِ زمہ واری کس ءَ نہ زرتگ۔