تربت ءَ بلوچ یکجھتی کمیٹی ءِ مراگش ءَ سدانی کچ ءَ جنین ءُ مردیناں بھر زرتگ

یکشمبے ءِ بیگاہ ءَ کیچ تربت ءَ بلوچ یکجھتی کمیٹی BYC ءِ چیردستی ءَ یک جوانیں مراگشے برجم دارگ بوتگ کہ اود ءَ سدانی کچ ءَ جنین ءُ مردیناں بھر زرتگ – مراگش ءِ مول بلوچ راج ءِ جیڑہ گچینی زورانسری آوار، ریاستی زوراکی ءُ بلوچ راج ءِ یکجاھی باروا تران ءُ راج باسما کنگ بیتگ –

مراگش ءَ تران کنان ءَ بی وائی سی ءِ بنجاھی رھشون ڈاکٹر صبیحہ بلوچ ءَ تران کنان ءَ گوشتگ کہ بلوچ ءَ پاکستان یا پاکستان ءَ بلوچ بوگی انت، بلوچ زوراکی ءِ بدل ءَ زوراکی ءِ راہ ءَ بہ گپت یا ریاست ھکاں بہ دنت – تاں ھما وھد ءَ زندگ بوگ ءُ سیاست کنگ ءِ ھک دیگ نہ بیت مارا گڈی ساہ ءَ داں گھگیری کنگی انت – گھگیری ایوک ءَ مئے پجار نہ انت مئے رکینگ ءِ گڈی راہ انت ھم، بلوچ ءَ ھرھال ءَ ھر جاہ ءَ وتی زور ءَ گوں گھگیری کنگی انت-

آئی ءَ گوشتگ کہ بلوچ ماتانی درد ءُ اندوہ ھر یک باسمائیں مردمے ءِ راجی میراس بوگ لوٹ ایت – بیگواھیں مردمانی داستان ءُ دروگیں میڑانی راستی بس یک مردمے ءِ درد نہ انت بلکیں سرجمیں راج ءِ جیڑہ انت ءُ اے کسھاں ھر یک دمگے ءَ سر کنگ مئے ءُ شمئے درسانی زمہ واری انت –

ھر یک بلوچے ءِ سر ءَ کہ زوراکی بیت آ چیر اش مہ دنت آیاں دیم ءَ بیار ایت، وتی درداں دل ءِ تہ ءَ دارگ ءُ اوپار کنگ ءِ بدل ءَ در ءِ بہ کنت ءُ وتی توار ءِ جوڑ بہ کنت – آیانی درد تاں ھما وھد ءَ مئیگ نہ بنت تانکہ آ آیاں ڈن ءَ در نہ کنت –

ڈاکٹر صبیحہ ءَ دیمتر ءَ گوشتگ کہ ھر یک بلوچے ءَ وتی کرد پیلو کنگی انت – ھر یکے ڈاکٹرے آ زدگ بوتگیں بلوچانی پہ دل ستک الاج ءَ بہ کنت، اگاں کسے وکیلے گڑا ا بیگواھیں بلوچ یا ایردستے ءِ کیس ءَ، اگاں لس مردمے گڑا یک زدگ یا نادراھیں بلوچے ءَ ھسپتال ءَ سرکنگ ءَ وتی کرد ءَ پیلو بہ کنت – وھدیکہ ھر یک مردمے وت ءَ باسما کنت گڑا یک مھکمیں راجی یکمشتی ءِ جوڑ بوت کنت –

آئی ءَ ریاستی شونداتانی سر ءَ نگد کنان ءَ گوشتگ اگاں ریاست ھمے لیک ایت کہ بلوچ یکجھتی کمیٹی ھلاس بیت کنت گڑا اے آئی ءِ واب انت، بی وائی سی یک نامے نہ انت بلکیں زرمبشے کہ ھر یک باسمائیں بلوچے ءِ دل ءِ تہ ءَ زندگ انت – تاں ھما وھد ءَ بلوچ ھست انت بی وائی سی ھست مان ایت –

آئی ءَ بی وائی سی بلوچ ءِ توار کتگ ءُ گوشتگ کہ راج وتی کسہ، درد ءُ اندوہ ءُ جیڑھاں اے پتر ءَ سر بہ کن انت تاکہ آ توار سرجمیں چاگرد ءُ جھان ءَ سر بہ بیت –

مراگش ءَ بلوچستان نیشنل پاٹی ءِ رھشون مھراب گچکی ایڈوکیٹ ءُ کیچ بار ایسوسی ایشن سروک مجید شاہ ایڈوکیٹ ءَ ھم تران کتگ؛

آیاں بیگواھیں مردم، انسانی ھکانی لگتمالی ءُ آمیدگسی انساپ ءِ سر ءَ شریں وڑے ءَ تران کتگ – ھمے وھد ءَ بیگواھیں مردمانی کھولانی گوم ءَ گپ ءُ باوستے ھم اڈ دیگ بیتگ کہ اود ءَ آیاں وتی دوستیگیں مردمانی دردناکیں وئیل درشان کتگ انت – مراگش ءَ لبزانک ءُ دودمان ھم ارزشت دیگ بوتگ انت –

شئر ءُ شائری ھم کنگ بوتگ کہ ھندی ءُ نامی ئیں شائراں بلوچ راج ءِ جاور، جھد ءُ امیتانی سر ءِ پربستگیں شئر ونتگ انت –

مراگش تاں شپ ءَ دیراں برجاہ بوتگ ءُ گڈ سر ءَ مراگش ءَ اتکگیں مردماں بلوچ یکجھتی کمیٹی ءِ پلامرزی ءِ کول کتگ –