چہ شال ءَ زربار ءُ روکپت ءَ کساس 120 کلومیٹر دوری ءَ بلوچستان ءِ شھر منگچر چار کلاک ءَ پد ھم سلاہ بندیں مردمانی کنٹرول ءَ انت، وھدے کہ سرکاری ملکیت؛ نادرا ءِ کارگس، بینک ءُ آمیدگس ءِ سر ءَ دستیگی کنگ ءُ سوچگ بوتگ انت ءُ سرکاری سلاہ ءُ گاڑی ھم دستیگ کنگ بوتگ انت۔
واکداراں اے بابت ءَ ھچ گپ نہ داتگ بلے جاور ھال ءِ سنگینی ءِ رد ءَ شال ءُ کراچی شھدگ بند کنگ بوتگ۔
دمگی مردمانی رد ءَ انگت ءَ سلاہ بندیں مردم شھر ءَ ھست اَنت ءُ لشکر ءِ مستریں کیمپ ءِ کش ءُ گور ءَ مزنیں تراک ءُ تیر گواری ءِ توار اشکنگ بوگ ءَ انت۔
سوشل میڈیا ءَ دمگی اھوالکارانی نیمگ ءَ شنگ کنگ بوتگیں بازیں ویڈیو ءُ اکسانی تہ ءَ سلاہ بندیں مردم بلوچستان ءِ بیرکاں مانپوشگ ءُ شھر ءِ تہ ءَ گشت ءُ گاڑیانی پٹ ءُ پول ءَ اَنت ءُ دمگی مردماں گوں گپ ءُ تران کنگ ءَ اَنت۔
ھالانی رد ءَ کراچی شال ءِ شھدگ ءَ تراکناک ساماناں گوں تباہ کنگ ءَ پد سلاھبند شھر ءِ تہ ءَ پترتگ انت۔
تاں انوگ ءَ اے وئیل ءِ زمہ واری ھچ سلاہ بندیں گل ءَ نہ زرتگ بلے بلوچ لبریشن آرمی ءَ ھمے رنگیں اُرش کتگ، اے سال ءُ گوست ءَ ھم شھر ءُ لشکری کیمپ گپتگ اَنت۔
زانگ بہ بیت بلوچستان ءَ گوستگیں ماھانی تہ ءَ اے رنگیں آپریشنانی تہ ءَ مزنیں گیشی یے گندگ بوگ ءَ انت ۔
اے سال ءِ فروری ءَ منگچر ءِ شھر ءِ مستریں شھدگ ءِ سر ءَ سلاہ بندیں مردماں سینڈک منسوبہ ءِ گاڑی نشانگ جوڑ کتگ انت۔ اے اُرش ءِ تہ ءَ یازدہ پروجیکٹ گاڑی تباہ بوتگ اَنت ءُ سیکورٹی ءِ پھجارینگ ءِ ھاترا فورسز ءِ گاڑی بمب تراک ءُ سلاہ بندیں اُرش ءِ آماچ بوتگ اَنت۔ ارش ءِ زمہ واری بلوچ لبریشن آرمی ءَ کبول کتگ ات۔