چہ شال ءَ ھالانی رد ءَ ھمے ماہ ءِ 26 اپریل ءَ پاکستانی لشکر ءَ رودراتکی بائی پاس ءِ سر ءَ چہ نائی ءِ دکان ءَ دو ورنا دزگیر کتگ ءُ ناشناسیں جاھے ءَ برتگ اَنت۔
دوئیں ورنایانی پجار عبدالباسط مالی خسن ءُ غلام محمد ء گھور خان ءِ ناماں بوتگ اَنت کہ اسپلنجی مستونگ ءِ نندوک اَنت۔
بلوچ یکجھی کمیٹی ءَ دوئیں مردمانی زورانسری بیگواھی ءِ ھال راست کتگ۔
زانگ بہ بیت کہ بلوچستان ءِ دمگ مستونگ ءِ ھند اسپلنجی ءَ گوستگیں چار روچ ءَ چہ یک فوجی آپریشنے برجاہ اِنت کہ ایشی ءِ تہ ءَ تاں انوگ ءَ پورسز ءَ پنچ مردم دزگیر کتگ ءُ پد ءَ بیگواہ کتگ انت۔
اسپلنجی ءِ وئیل ءِ ھلاپ ءَ دمگی مردماں ایف سی کیمپ ءِ دیم ءَ زھرشانی کتگ ءُ دزگیریں مردمانی یل کنگ ءِ لوٹ کتگ۔
دومی نیمگ ءَ بلوچستان ءِ دمگ آواران ءِ تھسیل مشکے ءَ یک مردمے ھم بندیگ کنگ ءَ پد پاکستانی لشکر ءَ پہ زور بیگواہ کتگ۔
اھوالانی رد ءَ بیگواھیں مردم ءِ پجار مشکے ءِ دمگ کندری ءِ نندوکیں محمد ءِ چُک نصیر احمد ءِ نام ءَ زانگ بیتگ۔ گوشگ بوگ ءَ انت کہ پاکستانی انٹیلی جنس ایجنسیاں دو روچ پیسر آ چہ وتی لوگ ءَ دزگیر کتگ ءُ چہ ایشی ءَ پد آ بیگواہ اِنت۔
دمگی مردمانی گشگ اِنت کہ پاکستانی لشکر ءَ نصیر احمد کیمپ ءَ تلب کتگ بلے آ وتی دزبندی ءِ سبب ءَ اود ءَ شت بوت نہ بوتگ ءُ پد ءَ لشکر ءَ آئی ءِ لوگ ءَ اُرش کتگ ءُ دزگیر کتگ ءُ بیگواہ کتگ۔