پسنی ءُ سبی ءَ بمب تراک دو مردم بیران یکے ٹپی

بلوچستان ءِ دو جتاجتائیں دمگاں بمب تراکانی آسر ءَ دو مردم بیران یکے ٹپی بیتگ-

پسنی شھر ءَ شپ ءِ کساس ساھت ھپت ءَ مسکان چوک کبرستان نزیک ءَ یک گاڑی یے بمب تراک ءِ نشانگ کنگ بیتگ-

پولیس اِھوالکار رِد ءَ تراک سک تُرند بیتگ چریشی ءِ آسر ءَ گاڑی ءَ سوار دو مردم جاہ پہ جاھی مرتگ اَنت، وھدے کہ یک مردمے ٹپی بیتگ-

بیران بیتگیں مردم ءِ پجّار سلمان ء منیر احمد جھمنند وارڈ نمبر یک ببّر شور پسنی ءُ محمد نواز ء محمد اعظم جھمنند حکیم والا نزیک چورنگی جوھرآباد خوشاب، پنجاب نام ءَ چہ بیتگ اَنت-

ٹپی ءِ پجّار شاہ نظار ء حلیم جھمنند وارڈ نمبر ھپت پسنی نام ءَ چہ بیتگ-

وئیل ءِ ھال سر بیگ پوج وئیلجاہ ءَ سر بیتگ ءُ دمگ انگیر ءَ کتگ منانک یکجاہ کنگ بندات کتگ-

ھمے وڑ سبی ءَ لائیو اسٹاک ڈپٹی ڈائریکٹر کارگس نزیک ءَ دستی بمب اُرشے بیتگ-

اے تراک یکشمبے ءِ بیگاہ ءَ بیتگ، ءُ اشی ءِ توار دیر دیر اش کنگ بیتگ اَنت-

تراک ءَ ھچ وڑیں جانی تاوان یا ٹپی ھال نیست-

تراک ءَ پد پوج ءَ دمگ انگیر ءَ کتگ منانک یکجاہ کتگ-

تنی وھدے دوئیں اُرشانی سوب زانگ نہ بیتگ اَنت نانکہ اُرشانی زمہ واری منّگ بیتگ اَنت-