ھوشاپ ءَ ناکہ بندی ءُ لیویز پوسٹ دستیگ کنگ زمہ واری بی ایل اے ءَ منّ اِتگ

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں تربت ءِ دمگ ھوشاپ ءَ دو جتاجتائیں کاروائیانی میان ءَ بُنجاھی شھدگ ءِ سر ءَ ناکہ بندی ءُ لیویز پوسٹ دستیگ کتگ-

جارکش ءَ گْوشتگ کہ بی ایل اے ءِ سرمچاراں گوستگیں شپ ءَ تربت ءُ ھوشاپ ءِ میانی بُنجاھی شھدگ سر بستگ ءُ پٹ ءُ پول کتگ- سرمچاراں بازیں کلاکاں تاں شھدگ دستیگ کتگ-

جارکش ءَ گْوشتگ کہ سرمچارانی دگہ یک ٹولی ءَ ھوشاپ گونڈ سرین لیویز پوسٹ سر ءَ دستیگ کنان ءَ اود ءَ ساڑی ئیں کارندہ دزگیر کتگ اَنت – سرمچاراں تھانہ ءَ ساڑی سرجمیں سلاہ وتی دستیگ کتگ اَنت، وھدے کہ لیویز کارندہ پد ءَ یل داتگ اَنت-

جارکش ءَ جیئند بلوچ ءَ گْوشتگ بلوچ لبریشن آرمی اے کاروائیانی زمہ واری ءَ منّ اِیت-