پسنی : زورانسری بیگواہ بیتگیں ورنایے ءِ لاش دزکپتگ

چہ پسنی ءَ یک کسان سالی ئیں ورنایے ءِ لاش دزکپتگ-

بلوچستان ءِ دمگ گوادر ءِ تھسیل چہ پسنی ءَ ھالانی رِد ءَ انتزامیہ ءُ یک کسان سالی ئیں ورنایے ءِ لاش دزکپتگ، کہ آ کُشگ ءَ پد لاش دور داتگ-

انتزامیہ ءَ لاش دستیگ کتگ نادُراھجاہ ءَ برتگ اود ءَ لاش ءِ پجّار پسنی ءِ جھمنند نظام ء محمود نام ءَ چہ بیتگ-

ھالانی رِد ءَ نظام ء محمود ھمے ماہ ءِ دوازدہ اپریل ءَ چہ ببر شور ءَ پاکستانی چیریں ادارھانی کارندھاں آوار جتگ ءُ ناشناسیں جاھے ءَ برتگ اَت چریشی ءَ پد آ دیم ءَ آرگ نہ بیتگ-

نظام ء محمود ءِ زورانسری بیگواھی پدری ھما وھد ءَ بلوچ یکجھتی کمیٹی ءَ کتگ، وھدے کہ گل ءَ آئی ءِ یل کنائینگ لوٹ ھم کتگ، بلے مروچی چار روچ ءَ پد آئی ءِ لاش دزکپتگ-

زانگ بہ بیت کہ بلوچستان ءَ لاشانی دزکپگ ءِ درچ یکرندے پد ءَ گوں تُرندی ءَ برجاہ ءَ اِنت وھدے کہ اے درگت ءَ بلوچستان ءِ جتاجتائیں دمگاں چہ بازیں لاشے دزکپتگ آیانی پجّار ءِ درگت ھچ وڑیں ھال دیم ءَ نیتکگ-

لاشانی ءِ دزکپگ ءِ دْرچ مروچی کیچ ءِ دمگ چہ بلیدہ ءَ ابوبکر نامیں مردمے ءِ لاش دزکپتگ وھدے کہ گوستگیں روچ ءَ ھب چہ ھب چوکی ءَ دو مردم لاش انتزامیہ ءَ دزگپتگ اَنت آیانی پجّار درگت ءَ ھچ وڑیں ھال سر نہ بیتگ-