بلوچستان ءَ تھتگ بندیں ھڑتال، لکپاس ءَ نندانک برجاہ

بلوچستان نیشنل پارٹی مینگل ءِ زھرشانی جار سر ءَ بلوچستان ءِ جتاجتائیں شھراں ھڑتال، کاروباری بُنجاہ بند ءُ زھرشانی نندانک ءَ مروچی دوشمبے روچ ءَ ھم برجاہ-

ھڑتال بی این پی ءِ سروک سردار اختر جان مینگل ءِ جار سر ءَ بلوچستان ءِ جتاجتائیں شھراں بی این پی لانگ مارچ انگیر ءِ ھلاپ ءَ برجاہ ءَ اِنت-

بلوچستان نیشنل پارٹی نیمگ ءَ چہ دیگ بیتگیں ھڑتال ءِ جار ءَ جتاجتائیں دمگاں شٹر ڈاؤن ھڑتال برجاہ ءَ اِنت چریشی ءَ دکان ءُ کاروباری بُنجاہ بند ءُ دگانی سر ءَ گاڑیانی روگ آیگ ھم بند بیتگ اَنت-

بلوچستان نیشنل پارٹی ءِ بُنجاھی جار پد ءَ تربت ءَ شٹر ڈاؤن ھڑتال شھر ءُ دگہ دمگاں سرجمیں کسانیں ءُ مزنیں کار ءُ بار بند بیتگ اَنت چریشی ءَ دمگی مردماں سک دلیساھی دیمپانی کنگ کپتگ- کار ءُ بار بُنجاہ، مارکیٹس، ھوٹل، ریسٹورنٹس، پٹرول پمپس ءُ شاپنگ مالز سرجمی ءَ بند کتگ، اشی ءَ اَبید، دگانی سر ءَ گاڑیانی روگ آیگ ھم مھتل بیتگ اَنت-

دومی نیمگ ءَ بلوچستان ءِ بُنجاھی شھر شال ءَ ھم بی این پی ءِ جار سر تھتگ بند ھڑتال کنگ بیتگ اود ءَ جتاجتائیں ھندانی سر ءَ دکان ، کار ءُ بار بُنجاہ، ءُ مارکیٹس بند بیتگ اَنت ءُ کچی بیگ، سریاب، دگ شال بازار ءُ برما ھوٹل ھوار اَنت، اود ءَ پُرکاری مھتل بیتگ اَنت-

ھُزدار ءَ ھم بی این پی ءِ جار پد ءَ سرجمی ءَ شٹر ڈاؤن ھڑتال کنگ بیتگ ءُ سرجمیں کار ءُ بار بُنجاہ بند اَنت اشی ءِ ھمراھی ءَ ھُزدار ءِ بازار ءَ کار ءُ بار پُرکاری مھتل بیتگ اَنت-

کلات ءَ ھم بی این پی ءِ بُنجاھی جار سر ءَ سرجمی ءَ تھتگ بندیں ھڑتال کنگ بیتگ کلات ءِ سرجمیں کار ءُ باری بُنجاہ، مارکیٹ ءُ کار ءُ بار بند بیتگ اَنت چریشی ءِ سبب ءَ راج ءَ ھمکروچی زرورتانی زیرگ ءِ دلسیاھی دیمپانی بیتگ، دیر دارج ءَ چہ آؤکیں مردم سامان زیرگ ءَ دلسیاھی دیمپانی بیتگ-

ھمے وڑ سردار اختر مینگل ءِ بُنکی دمگ وڈھ ءَ ھم لانگ مارچ سر ءَ کریک ڈاؤن ءُ لکپاس نندانک انگیر کنگ ھلاپ ءَ سرجمی ءَ تھتگ بندیں ھڑتال کنگ بیتگ، وڈھ ءَ سرجمیں کار ءُ بار ءِ بُنجاہ بند بیتگ، وڈھ ءَ ھڑتال گوستگیں روچ ءَ چہ برجاہ ءَ اِنت-

انچش دالبندین ءَ ھم بی این پی ءِ جار سر ءَ تھتگ بندیں ھڑتال برجاہ بیتگ دمگ ءَ سرجمیں کار ءُ بار ءِ بُنجاہ بند ءُ شھر ءُ کار ءُ باری پُرکاری بند بیتگ اَنت-

سرجمیں مکران ءَ ھم ھڑتال بیتگ، بی این پی ءِ بُنجاھی جار ءِ پلامرزی ءَ مکران ءِ بار وکیل ءُ آمیدگیسی کاروائیاں بھر نہ زیرگ جار جتگ چریشی ءِ سبب ءَ چہ آمیدگیسی جیڑہ اسرمند بیتگ اَنت-

سوراب ءُ بلیدہ ءَ ھم بی این پی ءِ جار سر ءَ سرجمی ءَ تھتگ بندیں ھڑتال کنگ بیتگ چریشی ءِ آسر ءَ کار ءُ بار ءِ بُنجاہ بند بیتگ اَنت-

پنجگور ءَ ھم بی این پی ءِ بُنجاھی جار سر ءَ تھتگ بندیں ھڑتال برجاہ بیتگ اد ءَ کار ءُ بار ءِ بُنجاہ ءُ مڈیانی ادارہ بند بیتگ اَنت ءُ دگانی سر ءَ ھچ گندگ نہ بیتگ-

بی این پی ءِ نیمگ ءَ چہ بلوچستان ءَ اے ھڑتال کارکنانی دزگیری ءُ لانگ مارچ ءِ دارگ ھلاپ ءَ کنگ بیتگ، مروچی ھڑتال بلوچ یکجھتی کمیٹی ءِ سرجمی ءَ پلامرزی گون بیتگ-