بلوچ یکجھتی کمیٹی ءِ بُنجاھی راھشون ڈاکٹر صبیحہ بلوچ ءَ آدینگ ءِ روچ ءَ مستونگ لکپاس ءِ ھند سر ءَ بی این پی ءِ نندانک ءَ چہ تران کنان ءَ گْوشتگ کہ وھدے ما بلوچستان گوش ایں – مئے درستانی چمّاں یک رُژنائی یے گندگ کئیت، مئے دل گل بنت، اے ھما مھر اِنت کہ مارا درستاں یکجاہ کنت، اے ھما مھر اِنت کہ مردمانی سینگ ءَ بولان کنت ءُ توکلاں چلتن جوڑ کنت-
آئی ءَ گْوشتگ کہ مروچی ما کہ زندمان ءَ گوازینگ ءَ ایں اے زندمانے نہ اِنت کہ ھرچ جاہ ءَ مارا جُست کنگ بہ بیت کجا چہ آیگ ءَ ئے کجا چہ روگ ءَ ئے –
آیاں گْوشتگ کہ اے زندمانے نہ اِنت ما ھر روچ لاش چست بہ کن ایں- اے زندمانے نہ اِنت ھر روچ ما وتی بیگواھیں براتاں بہ شوھاز ایں، اے زندمانے نہ اِنت کہ ڈن ءَ چہ کسے بئیت جست بہ کنت تو کے ءِ، تئی پجّار چی اِنت، تئی دمگ کجام اِنت اد ءَ چی کنگ ءَ ئے-
آئی ءَ گْوشتگ کہ ما اے اُمیت ءَ اوشتاتگ اَنت کہ وتی سرجمیں راج ءَ پاد کن ایں ءُ وتی دُژمن ءَ اد ءَ تچگ ءَ ھم موہ ندے ایں-
آئی ءَ گْوشتگ کہ ما وتی دُژمن ءِ اے سرجمیں ھیالاں ھم اد ءَ کلّ کن ایں، اے کرپٹ، دُز، بے زمیر ءُ بے اکلاک، اشی ءِ داتگیں سرجمیں آدّتاں اد ءَ کلّ کن ایں-
ڈاکٹر صبیحہ بلوچ ءَ گْوشتگ کہ مئے سر ءَ پرز اِنت کہ وتی چکاں، مردماں شئور بدے ایں کہ آ وتی سرڈگار واستا، وتی راج واستا چست بہ بنت- مروچی زالبول شئوری دروشم ءَ اے جُھد ءِ بھر اَنت، آ سرپد اَنت کہ جنگ تئی سر ءَ کئیت، تئی لوگ ءَ سر بیت گُڑا آ نچار اِیت تو جنینے ءِ یا کہ مردین-
دیمتر ءَ گْوشتگ کہ ما اے اُمیت ءَ اوشتاتگیں کہ وتی سرجمیں راج ءَ پاد بہ کن ایں ءُ وتی دُژمن ءَ اد ءَ چہ تاچینگ ءَ موہ ھم ندے ایں-
آئی ءَ گْوشتگ ما زان ایں کہ اے راہ سک نگیگیں اِنت، ما زان ایں کہ ما اشکرانی تہ ءَ دست مان کتگ اشی ءَ مئے دست سُتک کنت، ما زان ایں کہ اے راہ ءَ چینچو دلسیاھی ھست بلے ما اے ھم زان ایں کہ آ منزل چتو شوک اِنت- ما ھم زان ایں کہ ھمے بلوچستان واستا ما جُھد کنگ ءَ ایں آ چینچو زبیا اِنت-
آئی ءَ گوشتگ کہ مارا جزباتی گوشتگ اِت ، ءُ گوشتگ اِنت کہ آیاں دُژمن ندیستگ بلے ما اد ءَ گوش ایں تو یکجاھی ءِ تاکت ندیستگ کہ وھدے یک مردمے وتی سرجمیں آسودگی، وتی زندمان، وتی شریں روچ ءَ راج ءَ واستا یل کنت در کئیت گڑا راج آئی ءَ را تھنا یل ندنت-