بلوچستان ءَ زھرشانی، بازیں جاھاں انٹرنیٹ سروس بند

بلوچستان ءِ بازیں جاھانی ھواری ءَ شال ءَ انٹرنیٹ سروس داں انگت ءَ بند اِنت- چریشی ءِ سبب ءَ مھلوک ءَ بازیں جنجالانی دیمپانی انت-

گوستگیں ماہ ءَ بلوچ یکجھتی کمیٹی ءِ زھرشانیانی وھد ءَ شال ءَ بازیں روچاں انٹرنیٹ بند کنگ بیتگ ءُ نی بلوچستان نیشنل پاٹی ءِ لانگ مارچ ءَ پد ھم انٹرنیٹ سروس اڑانک برجاہ انت-

شال ءُ مستونگ ءَ یکم اپریل ءَ موبائل انٹرنیٹ بند انت بلے پی ٹی سی ایل ءُ لینڈ لائن انٹرنیٹ پچ انت سرکاری لیکھانی بنگپ ءِ رد ءَ انٹرنیٹ سروس ءِ بندش سیکورٹی ءِ ترس ءِ بنیاد ءَ کتگ بلے بی این پی ءِ رھشونانی گوشگ انت کہ اے گامگیج زھرشانی ءِ بے سوب کنگ ءِ جھدانی بھر انت-

انٹرنیٹ ءِ بندش ءِ سبب ءَ مھلوک ءَ بازیں رنگے ءَ مشکلانی دیمپانی انت گیشتر درملکانی مھلوک ءَ وتی کھولانی گون ءَ عید ءِ وھد ءَ رھوت کنگ ءَ ھم مشکلانی دیمپانی کنگ کپتگ-

بی این پی ءَ ماہ رنگ ءَ ھوار بلوچ یکجھتی کمیٹی ءِ باسکانی دزگیری ءِ ھلاپ ءَ 28 مارچ ءَ چہ وڈھ ءَ داں شال ءَ لانگ مارچ کنگ بندات کتگ بلے زھرشانی کنوک شال ءَ پترگ ءَ دارگ بیتگ انت ءُ بی این پی ءَ مستونگ ءَ لکپاس ٹنل ءِ نزیک ءَ زھرشانی نندانک داتگ کہ گوستگیں یک ھپتگے ءَ چہ برجاہ انت-

بی این پی ءِ سروک سردار اختر مینگل ءَ گوشتگ سرکار ءِ گپ ءُ تران بے سوب بیتگ چریشی ءَ شش اپریل ءَ دوبر شال ءِ نیمگ ءَ پیشگامی کنت اِنت-

آئی ءَ گوشتگ مستونگ ءَ مئے گپ ءَ گوشدارگ ءَ نہ اَنت نی شال ءَ رویں وتی توار ءَ دیمتر ءَ جنزین انت-

سرکار ءَ زھرشانی کنوک شال ءِ پترگ ءَ دارگ ءِ ھاتر ءَ مستونگ ءُ شال ءِ میان ءَ بازیں جاھاں کنٹینرز ءُ اڑانک بندات کتگ انت ءُ لکپاس ٹنل ءِ نزیک ءَ دگ ءِ سر ءَ گار جنگ بیتگ ءُ راہ بند کنگ بیتگ-

راھانی بندش ءِ سبب ءَ چہ بیست ءُ ھشت مارچ ءَ بہ گر داں انیگ ءَ مستونگ، کلات، سوراب، ھزدار، نوشکی، ھاران، چاگی، واشک، پنجگور، کیچ ءُ گوادر ءَ شال ءِ زمینی راہ سستگ انت-

دومی نیمگ ءَ چہ گوادر ءَ ھک دو تھریک ءُ جماعت اسلامی بلوچستان ءِ استانی سروک مولانا ھدایت الرھمان ءَ ھم ماہ رنگ بلوچ ءَ ھوار بلوچ زالبولانی دزگیری ءِ ھلاپ ءَ ھپت اپریل ءَ چہ گوادر شال ءَ لانگ مارچ ءِ جار جتگ –

اود ءَ جمھوری وتن پاٹی ءِ رھشون ءُ گوستگیں استانی اسمبلی ءِ باسک نوابزادہ گوھرام بگٹی سرکار ءَ بلوچ یکجھتی کمیٹی ءِ سر ءَ کریک ڈاؤن ءُ بلوچ زالبولانی دزگیری ءِ ھلاپ ءَ لانگ مارچ ءِ پژدر ءَ دزگیر کتگ-