سول ھسپتال ءَ لاشانی پجّار کنگ واستا آؤکیں سعیدہ بلوچ گْھار ءَ ھوار پولیس ءِ دست ءَ بندیگ اَنت

گوستگیں روچ ءَ سول ھسپتال ءَ آرگ بیتگیں لاشانی پجّار واستا رؤکیں جنین ءُ مردینانی سر ءَ پولیس ءِ لَٹ ءُ کُٹ ءَ پد آوار جتگ اَنت، کہ اَنت شال سول لائن پولیس تھانہ ءَ بندیگ اَنت-

شپ وھد ءَ دزگیر بیتگیں زالبولانی سیاد ءُ وکیلاں پولیس تھانہ ءَ شتگ ءُ آیانی گوم ءَ ملّگ جُھد کتگ بلے وکیل رِد ءَ زالبول تھانہ ءَ بند کتگ اَنت وھدے کہ مردین ناشناسیں جاھے ءَ برتگ اَنت-

زانگ بہ بیت کہ گوستگیں روچ ءَ پاکستانی پوج ءَ بیست سے لاش شال سول ھسپتال آورتگ اَنت، کہ آیانی پجّار ھاتر ءَ بیگواھیں مردمانی کھول نادُراھجاہ ءَ سر بیتگ اَنت-

سعیدہ بلوچ کہ آئی ءِ یک براتے ءُ گھازرتکے بازیں سالاں چہ زورانسری بیگواہ اَنت وتی گْھار ءِ ھمراھی ءَ لاشانی پجّار کنگ ھاتر ءَ سول ھسپتال شال ءَ ساڑی اَنت-

اے میان ءَ لاشانی پجّار کنگ ءَ پد کھول ءَ پنچ لاش وتی دستیگ کتگ اَنت، کہ اشی ءَ پد پولیس ءِ مزنیں کچے ءَ ھسپتال ءَ سر بیتگ ءُ زالبول ءُ دگہ کھول لَٹ ءُ کُٹانی نشانگ کتگ اَنت ءُ بازیں مردمے دزگیر کتگ اَنت انگت پولیس ءِ دست ءَ اَنت-

سعیدہ بلوچ کہ وت انسانی ھکانی کارکنے کہ آئی ءِ دزگیری ءِ درگت ءَ بلوچ یکجھتی کمیٹی ءِ راھشون ماہ رنگ بلوچ ءَ گْوشتگ مئے دلیریں سنگت سعیدہ بلوچ ءُ آئی ءِ گْھار ءِ ھمراھی ءَ گیر کانونی ھساب ءَ آوار جتگ تھنا ھمے واستا کہ آ وتی بیگواھیں برات ءُ گْھارزتک درگت ءَ سرپدی لوٹگ ءَ اِنت-

ماہ رنگ بلوچ ءَ گْوشتگ کہ سعیدہ ءَ یک تھنائیں ماتے کہ آئی ءَ ریاست ءِ دست ءَ وتی لوگ واجہ فیصل بلوچ ءِ کوش ءَ پد وتی دوئیں چُکاں تھنا رودینگ ءَ اِنت بلوچستان ءَ وتی ھکانی درگت ءَ سرپد بیگ جرم جوڑ بیتگ ما سول ھسپتال ءَ چہ دزگیر بیتگیں سعیدہ بلوچ ءَ ھوار سرجمیں مردین ءُ جنیناں زوت یل کنگ لوٹ ءَ کن ایں-