منگچر ءَ پاکستانی پوج ءِ دست ءَ یک مردمے بیگواہ، دمگی مردمانی نندانک

یک مردمے زورانسری آوار جنی ءِ ھلاپ ءَ منگچر ءِ ھند سر ءَ نندانک برجاہ، بُنجاھی شھدگ بازیں کلاکاں چہ بند اِنت-

بلوچستان ءِ دمگ کلات ءِ ھند منگچر ءَ دمگی مردماں شال کراچی راجی شھدگ سر ءَ نندانک داتگ دگ گاڑیانی واستا بند کتگ، چریشی ءِ سبب ءَ راجی شھدگ سر ءَ گاڑیانی دراجیں لین لگ اِتگ-

منگچر نندانک پاکستانی پوج ءِ دست ءَ زورانسری آوار جنی ءِ نشانگ کنگ بیتگیں مردم ءِ کھول ءُ دمگ مردمانی نیمگ ءَ چہ دیگ بیگ ءَ اِنت-

چہ کلات ءَ اِھوالکار رِد ءَ مروچی بیگاہ ءَ ھپت گاڑیانی سر ءَ ھمگرنچیں ایف سی کارمنداں چہ کلات ءِ بازار ءَ عبدالحمید بنگلزئی نامیں مردمے آوار جتگ ءُ وتی ھمراھی ءَ برتگ چریشی ءَ پد آ دیم ءَ آرگ نہ بیتگ-

منگچر نندانک ءِ مردماں واکدار ءُ پوج ءَ چہ عبدالحمید بنگلزئی ءِ زوت دیم آرگ ءُ یل کنائینگ لوٹ کتگ-

زھرشانی کنوکانی رِد ءَ عبدالحمید یک دکاندارے ءُ منگچر بازار ءَ یک بیکری یے بیتگ ئِے پاکستانی پوج ءَ آئی ءَ دکان سر ءَ بیڑبرتگ آ لَٹ کُٹ کنگ ءَ پد بیگواہ کتگ، اگاں آ زوت یل کنگ نہ بیت گُڑا آیانی نندانک شال کراچی راجی شھدگ سر ءَ برجاہ بیت-

شپ ءِ وھد ءَ دگ ءَ گاڑیانی روگ آیگ پچ نہ بیتگ وھدے کہ واکدار نیمگ ءَ چہ ھچ وڑیں درشان دیم ءَ نیتکگ-