ھب : زورانسری آوار جنی ءِ ھلاپ ءَ زھرشانی برجاہ، بُنجاھی شھدگ ھشت کلاکاں چہ بند

ھب چوکی ءَ زورانسری بیگواھیں مردمانی کھولانی نیمگ ءَ وتی دوستناکانی یل نہ کنگ ھلاپ ءَ زھرشانی برجاہ ءَ اِنت، چریشی ءِ سبب ءَ کراچی شال بُنجاھی شھدگ گوستگیں ھشت کلاکاں چہ ھرچ وڑیں روگ آیگ واستا بند اِنت-

پاکستانی پوج ءِ دست ءَ زورانسری آوار جنی ءِ نشانگ کنگ بیتگیں دوئیں برات ، جنید حمید ءُ یاسر حمید، ءِ ھمراھی ءَ چاکر بگٹی ءِ کھول ءَ مروچی سھب ءَ چہ بھوانی ءِ ھند سر ءَ شھدگ بند کتگ، چریشی ءَ چہ کراچی شال، گوادر ءُ دگہ دمگاں چہ زمینی اِھوال مھتل بیتگ-

شھدگ سر ءَ نندانک سبب ءَ مزنیں کچے ءَ گاڑی کٹّ اَنت وھدے کہ انتزامیہ ءِ گوم ءَ باز رند ءَ گپ دیوان بے سوب بیتگ –

بلوچ یکجھتی کمیٹی ءِ رِد ءَ چاکر بگٹی پانزدہ نومبر دوھزار بیست چار ءَ ھب چوکی ءِ آر سی ڈی دگ سر ءَ ٹویوٹا شرکت دیم ءَ چہ زورانسری بیگواہ کنگ بیتگ- مروچی آئی ءِ بیگواھی ءَ دو ماہ ءُ شانزدہ روچ سرجم بیتگ، بلے تنی وھدے آئی ءِ ھچ وڑیں ھال دز نہ کپتگ-

چاکر بگٹی ءِ کھول ءَ اشی ءَ ساری ھم زھرشانی کتگ دگ بند کتگ، چریشی ءَ ھب انتزامیہ ءَ گپ دیوان کتگ ءُ ٹاہ داتگ کہ چاکر بگٹی ھب سٹی تھانہ ءَ ساڑی اِنت، وھدے کھول تھانہ ءَ سر بیتگ گُڑا اود ءَ آئی ءِ ھچ وڑیں نام ءُ نشان نہ بیتگ-

اشی ءَ پد کھول ءَ پریس کانفرنس کتگ ھب انتزامیہ دہ روچ وھدے داتگ ءُ کڈن کتگ کہ اگاں چاکر بگٹی یل کنگ نہ بیت گُڑا تُرندیں زھرشانی ءَ لاچار بہ ایں-

ھمے وڑ گوستگیں سال ءَ چہ ھب ءُ کلات ءَ زورانسری آوار جنی ءِ نشانگ کنگ بیتگیں جنید ءُ یاسر ء عبدالحمید ھم دیم ءَ آرگ نہ بیتگ اَنت، وھدے کہ کھول ءَ وتی دوستناکانی زوت یل کنگ لوٹ کنگ ءَ اَنت-

بی وائی سی رِد ءَ چاکر بگٹی، جنید ، یاسر حمید ءِ کھول آیانی یل کنگ ھاتر ءَ بھوانی ءِ ھند سر ءَ نندانک داتگ ءُ دگ بند کتگ-

گل ءَ ھب ءُ کش گور ءِ بلوچ جھمننداں چہ دزبندی کتگ کہ آ انسانی ھکانی پھازگ ھاتر ءَ نندانک ءَ ھوار بہ بنت ءُ زورانسری بیگواھیں مردمانی کھول ءِ گوم ءَ یکجاھی درشان بہ کن اَنت-