بلوچ اسٹوڈنٹس ایکشن کمیٹی ءِ سال بندات ءَ کتاب کاروان ءِ نام ءَ بلوچستان ءَ میڑھانی درچ یکشل ءَ برجاہ انت –
کتاب کاروان میڑہ بساک ءَ نوکیں سال بزانکہ دوھزار ءُ بیست ءُ پنچ ءِ بندات ءَ بندات کتگ انت ءُ اود ءَ بازیں جاھاں کتاب کاروان میڑہ برجاہ بیتگ انت-
گوستگیں روچ ءَ پنجگور تسپ، ھوشاپ، الندور بلیدہ ، دشت تولگی، سوراب، نوکنڈی، جھل مگسی ءُ وندر ءَ کتاب میڑہ برجاہ دارگ بیتگ انت-
مروچی گوادر ءَ ڈوریا اکیڈمی ءِ دیم ءَ برجم دارگ بیتگ ءُ گوستگیں روچ ءَ دی اویسس اسکول ءِ دیم ءَ برجم دارگ بیتگ –
بساک ءِ نیمگ ءَ شنگ بیتگیں تامر بنداں کتاب میڑھانی وھد ءَ سرکاری واکدارانی نیمگ ءَ بیھار ءُ ترسینگانی درچ برجاہ انت-
بساک ءِ گوشگ انت کہ کتاب کاروانانی دارگ ءُ گل ءِ کتاب میڑھانی باسکانی ترسینگ ءِ مول ءُ مراد ایش کہ بلوچاں اَچ وانگ ءُ زانگ ءَ دور کنگ انت ءُ سرکار ءُ آئی ءِ واکدار یکشل ءَ گل ءِ ھمراھاں ترسینگ ءَ انت-