شال ءُ پسنی ءَ پولیس ءُ کوسٹ گارڈ ءِ سر ءَ بیتگیں اُرشانی زمہ واری بی ایل ایف ءَ منّ اِتگ اَنت

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں شال ءُ پسنی ءَ دو جتاجتائیں اُرشاں پولیس ءُ کوسٹ گارڈ کارمنداں نشانگ کتگ ءُ جانی تاوان داتگ اَنت-

جارکش ءَ گْوشتگ کہ مئے سرمچاراں ھپت جنوری ءِ بیگاہ ءَ ساھت ھپت نزیک ءَ شال ءِ دمگ سریاب گاھی خان چوک سر ءَ پولیس گاڑی اُرش نشانگ کتگ چریشی ءَ چہ سے پولیس کارمند سک ٹپی بیتگ اَنت-

جارکش ءَ گْوشتگ کہ اے اُرش پولیس ءِ کڈن کنگ واستا کنگ بیتگ کہ آ زورگریں پاکستانی پوج ءِ ھمراھی ءَ چُکچینی ءُ زلیل کنگ ءِ بھر مہ بنت ءُ بلوچ زرمبشت ءِ دیم ءَ اڑان بیگ ءَ پھریز بہ کن اَنت-

جارکش ءَ گْوشتگ کہ اُرش ءَ پد سرمچارانی سر ءَ پسّھی تیرگواری کتگ، پولیس ءِ تیرگواری ءَ چہ یک راھگوزیں چکے بیران بیتگ- ما اے کھول ءِ گماں ھوار ایں- یکرندے پد ءَ بلوچ راج ءَ چہ دزبندی کن ایں کہ آ زورگریں پوج ءُ آئی ءِ کمکاراں چہ گستا بہ بنت دانکہ وت ءَ جانی تاوان ءَ رکینت بہ کن اَنت-

جارکش ءَ گْوشتگ کہ دگہ اُرشے سرمچاراں ھپت جنوری ءِ بیگاہ ھپت چل ملٹ ءِ سر ءَ پسنی شھر ءَ کٹاؤ بنگلہ بازار ءَ برجاھیں کوسٹ گارڈ بُنجل ءِ بُنجاھی پھازوکی چوکی دستی بمب اُرش ءَ نشانگ کتگ، چریشی ءِ چہ کوسٹ گارڈ ءِ دو کارمند ٹپی بیتگ اَنت-

جارکش ءَ گْوشتگ کہ بلوچستان لبریشن فرنٹ دوئیں اُرشانی زمہ واری ءَ منّ اِیت- ءُ اے اِھد کنت کہ بلوچستان ءِ وتواجھی ءَ تاں زورگریں پوج ءُ آئی ءِ کمکارانی سر ءَ اُرش برجاہ بنت-