چہ کیچ ءَ پاکستانی پوج ءِ دست ءَ زورانسری بیگواہ زمان جان ءُ ابوالحسن بلوچ ءِ کھول ءَ گْوشتگ کہ ھکومت ءُ انتزامیہ دلجمی دیگ ءَ ابید زمان جان ءُ ابوالحسن بلوچ تنی وھدے یل کنگ نہ بیتگ اَنت گُڑا سی پیک دگ ھوشاپ ھند سر ءَ بے مدت ءَ تاں بند کنگ بیت-
زمان جان ءُ ابوالحسن بلوچ ءِ کھول ءَ گوشتگ کہ اے دوئیں ڈسٹرکٹ کونسل کیچ ءِ چیئرمین ھوتمان بلوچ ءَ وتی لوگ ءَ لوٹائینتگ زورانسری بیگواہ کتگ چریشی ءِ ھلاپ ءَ ما سی پیک دگ ھوشاپ ھند سر ءَ بند کتگ ءُ نندانک داتگ، نندانک ھند ءَ چہ انتزامیہ ءُ ھکومتی نمائندگاں چہ گپ دیوان ءَ مارا دلجمی دیگ بیتگ کہ دو روچانی تہ ءَ زمان ءُ ابوالحسن بلوچ یل کن ایں، بلے مروچی پنچ روچ ءَ گوزگ ءَ اَبید آ انگت یل نہ کتگ ءُ نانکہ مارا گوشگ ءَ اَنت آ اے وھد ءَ کجا بنداں-
آیاں گوشتگ کہ دمگی انتزامیہ ءُ ھکومت یکو دروگیں پندل ءُ جتاجتائیں دروشماں مارا تُرسینگ ءَ اَنت- ما سی پیک دگ سر ءَ وتی نندانک ھمے ھاتر ءَ ھلاس کتگ کہ دو روچانی تہ ءَ مئے دوستناکاں یل کن اَنت بلے ھکومت ءَ داتگیں وھد سر ءَ زمان ءُ ابوالحسن یل کنائینگ ءَ بے سوب بیتگ ھمے ھاتر ءَ یکرندے پد ءَ سی پیک دگ بند کتگ نندانک دیگ ءَ ایں-
آیاں گْوشتگ کہ مروچی شپ ءَ تاں آ یل کنگ نہ بیت اَنت گُرا ھوشاپ ھند سر ءَ سی پیک شھدگ بے مدت ءَ تاں بند کنگ بیت-