ھب چوکی : زبیر بلوچ ءِ زورانسری آوار جنی ءِ ھلاپ ءَ بُنجاھی شھدگ سر ءَ نندانک برجاہ گاڑیانی روگ آیگ مھتل

چہ ھب چوکی ءَ زورانسری آوار جنی ءِ نشانگ کنگ بیتگیں زبیر بلوچ ءِ یل کنائینگ ھاتر ءَ آئی ءِ کھول ءُ شھریانی یکشل ءَ زھرشانی برجاہ ءَ اِنت- تُرندیں سارتی ءَ اَبید کھول ءَ گوستگیں ھشت کلاکاں چہ کراچی ، شال شھدگ ھب چوکی ھند سر ءَ پہ گاڑیانی واستا بند کتگ ، چریشی ءِ سبب ءَ چہ ھزارانی گاڑی ءُ مساپر گٹّ اَنت-

واکدار نیمگ ءَ چہ گپ دیوان واستا ساڑی بیگ ھال اِنت، بلے زبیر بلوچ کھول ءَ آئی ءِ زوت یل کنائینگ ءَ تاں زھرشانی ھلاس کنگ انکار کتگ-

زھرشانی کنوکانی گْوشگ اِنت کہ زورانسری آوار جنی ءِ یک بلاھیں انسانی ھکانی ھلاپ ورزی یے ءُ آ انساپ ءِ ھاتر ءَ ھرچ وڑیں گامگیج بزور اَنت-

زبیر بلوچ ، کہ بلوچستان شھدربرجاہ ءَ چہ پولیٹیکل سائنس ءَ گریجویٹے ءُ اِھوالکاری پڑ ءَ ھم ھمگرنچ بیتگ، گوستگیں شپ ءَ ھب چوکی ءَ آئی ءِ لوگ ءَ چہ پوج ءَ آوار جتگ ءُ بیگواہ کتگ-

کھول رِد ءَ زبیر بلوچ یک مھنتی نودربرے ءُ ورنا ایں اِھوالکارے بیتگ کہ گوست ءَ دمگی ھالتاک “انتخاب ” ءَ چہ ھم سیادی بیتگ-

زبیر بلوچ ءِ کھول ءَ راج ءَ چہ دزبندی کتگ کہ آ اے زھرشانی ءَ بھر بزور اَنت ءُ وتی توار ءَ اے ایردستانی ھک ءَ چست بہ کن اَنت کہ آ ریاستی ادارھانی نیمگ ءَ چہ نشانگ کنگ بیگ ءَ اَنت-

زھرشانی کنوکاں تچک کتگ کہ اگاں زبیر بلوچ زوت یل کنگ نہ بیت گُڑا زھرشانی ءَ گیش تُرند کنگ بیت-

زھرشانی ءَ نشتگیں مردمانی گْوشگ اِنت کہ آ اے سارتی ءَ ھم پُشت کنزوک نہ اَنت ءُ انساپ ءِ مول ءُ مراد ءَ تاں ھرچ ھد ءَ رو ایں-