راشد حسین ءِ زورانسری آوار جنی ءَ شش سال، ھب ءَ زھرشانی

بلوچستان ءِ باپاری شھر ھب چوکی ءَ زورانسری بیگواہ بلوچ کارکن راشد حسین ءِ زورانسری آوار جنی ءَ شش سال سرجم بیگ ءُ یل نہ کنگ ءِ ھلاپ ءَ کھول نیمگ ءَ چہ زھرشانی ئیں روانک ءُ زھرشانی کنگ بیتگ- راشد حسین، کہ دوھزار ھژدہ ءَ چہ متھدہ ارب امارات ءَ بیگواہ کنگ بیتگ، شش سال ءَ چہ زورانسری آوار جنی ءِ نشانگ اِنت- کھول رِد ءَ راشد حسین دوھزار ھپدہ ءَ درانڈیھ ءَ شتگ ءُ متھدہ ارب امارات ءَ جھمنند بیتگ اود ءَ چہ آ آوار جتگ ءُ شش ماہ ءَ تاں آ متھدہ ارب امارات ءَ بیگواہ بیتگ – اشی ءَ پد آ بید کانودی کار ءُ کاگدے ءَ پاکستان دست ءَ داتگ-

کھول ءَ گْوشتگ کہ پاکستان ءَ برگ ءَ پد راشد حسین انگت بیگواہ ءَ اِنت، آئی ءِ کھول ءَ سندھ ہائی کورٹ، بلوچستان ہائی کورٹ، اسلام آباد ہائی کورٹ ءُ بیگواھیں مردمانی کمیشنز ءُ کمیٹیانی ایف آئی آر نکش کتگ، بلے تنی وھدے ھچ وڑیں پسّہ نہ رس اِتگ-

راشد حسین ءِ زورانسری آوار جنی ءَ شش سال سرجم بیگ ءَ اسلام آباد ہائی کورٹ ءَ راشد حسین ءِ وکیل ءُ انسانی ھکانی کارکن ایمان مزاری ءَ گْوشتگ کہ پاکستان ءِ وزارت خارجہ ءَ منّ اِتگ کہ راشد پاکستان ءَ آرگ بیتگ، بلے ھکومت ءُ واکدار آئی ءِ ساڑی بیگ یا آئی ءِ درگت ءَ سرپدی دیگ ءَ نہ اَنت-

مروچی زھرشانی ءِ میان ءَ راشد حسین ءِ مات ءَ وتی شش سال جُھد ءَ درگت ءَ گپ کنان ءَ گْوشتگ کہ شش سال ءَ چہ وتی چک ءِ شوھاز کنگ ءَ آں – بلے من آں ھچ وڑیں پسّہ دیگ بیگ ءَ نہ اِنت-

منی چک درکانودی آوار جتگ، ءُ من ھرچ آمیدگس ءُ کمیشن ءِ در ءَ شتگ آں، بلے انساپ ءِ نزام ءَ منی کُمک نہ کتگ

آئی ءَ گْوشتگ کہ اے پاکستان ءِ کانودی نزام ھسیت ایں؟ پرچا مات وتی چک واستا انساپ لوٹگ ھم جرمے؟ منی چُک اگاں چُشیں جرمے پدر بیتگ گُڑا آئی ءَ آمیدگس ءَ پیش بکن- بلے آ شش سال ءَ چہ گار اِنت ءُ اشی ءِ سر ءَ بے تواری کبول نہ اِنت- آئی ءَ دیمتر ءَ گوشتگ کہ پاکستان ءِ کانودی نزام ءَ مارا بے یار ءُ مددگار یل داتگ اَنت منی چک بیگواہ کنگ ناں تھنا درکانودی اِنت بلکیں انسانی ھکانی بلاھیں ھلاپ ورزی اِنت ھم من سرجمیں ادارھاں ءُ انسانی ھکانی گلاں چہ دزبندی کن آں کہ آ مئے توار ءَ گوشدار ءُ انساپ دیگ ءَ مئے کمک ءَ بہ کن اَنت-

اے درگت ءَ ھب چوکی ءَ زھرشانی ءَ دگہ بیگواھیں مردمانی کھول ھم ھوار بیتگ اَنت-

بیگواھیں اسلم بلوچ ءِ مات ءَ گْوشتگ کہ منی چک بازیں سالاں چہ بیگواہ ءَ اِنت- مارا تھا دروگیں کول ءُ تسلہ دیگ بیت، بلے تاں مروچی ھچ وڑیں گوشدارگ نہ بیتگ – ما وتی چُکاں یل کنائینگ تاں وتی جُھد ءَ برجاھیں-

زھرشانی ءَ شھری ءُ سیاسی پارٹی راھشوناں ھم بھر زرتگ-

ترانکاراں بلوچستان ءَ انسانی ھکانی ھلاپ ورزیاں ءُ زورانسری آوار جنی ءِ جیڑہ سر ءَ سک ایرجنی جتگ-

زھرشانی ءَ چہ تران ءَ بی ایس او بچار ءِ گوستگیں چیئرمین واحد رحیم ءُ عمران بلوچ ءَ تران کنان ءَ گْوشتگ کہ بلوچستان ءَ زورانسری آوار جنی ءِ یک لس گپے جوڑ بیتگ- ھکومت ءُ ریاستی ادارہ اے جیڑہ سر ءَ بے توار اَنت، وھدے کہ اسرمندیں کھولاں بیھار دیگ بنت ءُ آیانی زھرشانیاں ایرموش کنگ جُھد کنگ بیت اے کار ناں تھنا درکانودی انسانی بلکیں آئین ءُ کانود ءِ ھم ھلاپ ورزی اِنت-

آئی ءَ گْوشتگ کہ پاکستان ءَ زورانسری آوار جنی جیڑہ گیش بوان اَنت اے کار انساپ ءُ انسانی ھکانی ھلاپ ورزی اِنت- راشد حسین ءُ دگہ بیگواھیں مردماں زوت یل بہ کن اِت ءُ زمہ وارانی ھلاپ کانودی کاروائی کنگ بہ بیت-

زھرشانی ءَ ھواریں مردماں راشد حسین بلوچ ءَ ھوار سرجمیں بیگواھیں مردماں زوت یل کنگ لوٹ کتگ ءُ گوشتگ کہ آ انساپ مول ءُ مراد واستا وتی جُھد ءَ برجاہ دار اَنت- زھرشانی کنوکاں میانی استمانی ءُ انسانی ھکانی گلاں چہ دزبندی کتگ کہ آ انسانی لگتمالی ءِ سر ءَ دلگوش بدے اَنت ءُ بیگواھیں مردمانی یل کنائینگ ءَ ھاتر ءَ گامگیج بزوراں