زورانسری بیگواھیں زمان جان ءُ ابوالھسن ءِ کھول ءِ نیمگ ءَ چہ چارشمبے ءَ سی پیک شھدگ ایم ایٹ سر ءَ نندانک دومی روچ ءَ ھم برجاہ ءَ اِنت چریشی ءَ زالبول زھگ ءُ مردیناں شھدگ گاڑیانی واستا بند کتگ-
گوستگیں شپ ءَ دمگی انتزامیہ ءِ گوم ءَ گپ دیوان دومی بھر بے سوب بیتگ ءُ کھول ءَ شھدگ پچ کنگ انکار کتگ- نندانک ءَ نشتگیں مردمانی گْوشگ اِنت کہ سے شمبے ءِ بیگاہ ءَ رسالدار میجر لیویز فورس ءَ نندانکجاہ ءَ گپ دیوان جُھد کتگ بلے آ سوبمند نہ بیتگ اَنت اشی ءَ پد شپ ءَ اسسٹنٹ کمشنر تربت ءَ ھوشاپ زیرو پوائنٹ سر ءَ نندانک ءَ نشتگیں مردمانی گور ءَ شتگ آیاں گپ رپ کتگ ءُ آیاں نندانک ھلاس کنگ ءُ شھدگ پچ کنگ واتر روگ ءِ شرت ایر کتگ ءُ دو روچاں بیگواھیں زمان جان ءُ ابوالحسن ءِ یل کنائینگ دلجمی داتگ بلے اے گپ دیوان ھم سوبمند نہ بیتگ-
زانگ بہ بیت کہ زمان جان، الطاف ءُ ابوالحسن چیزے روچ ءَ ساری چہ تربت ءَ بیگواہ کتگ اَنت، آئی ءِ بھتام آیانی کھول ءَ یک پریس کانفرنسے ءِ میان ءَ ڈسٹرکٹ کونسل چیئرمین ھوتمان سر ءَ جتگ ءُ گْوشتگ کہ اے ورنا وتی لوگ ءَ لوٹائینتگ ءُ پد ءَ پاکستانی ادارھانی دست ءَ داتگ اَنت-
آیاں انتزامیہ ءَ سے شمبے ءَ روچ ءَ تاں اے ورنایانی یل کنائیگ ھاتر ءَ وھد داتگ اَت چریشی ءَ پد الطاف یل کنگ بیتگ ءُ زمان جان ءُ ابوالحسن انگت بیگواہ ءَ اِنت-