اسلام آباد ءِ یک سول آمیدگس ءَ بلوچ یکجھتی کمیٹی ءِ لانگ مارچ ءِ درگت ءَ ایپ آئی آر بوتگیں بی وائی سی ءِ رھشون ڈاکٹر ماھرنگ بلوچ ءُ گون بوتگیں 85 باسکانی ھمراھی ءَ چہ آمیدگیس ءَ آجو کنگ بوتگ اَنت۔
اے ایپ آئی آر گوستگیں سال ءَ، چہ ترنول تھانہ اسلام آباد ءَ رپورٹ کنگ بوتگ اَنت۔
اسلام آباد ءِ بُنجاھی پولیس ءَ لانگ مارچ ءِ مردمانی ھلاپ ترنول ءُ کوھسار تھانہ ءَ دو ایپ آئی آر رپورٹ کنگ بوتگ اَنت۔
دسمبر 2023 ءِ دزنبشت ءَ بوتگیں ایپ آئی آر ءَ بازیں کچءَ 282 مردمانی نام گپت کتگ اَنت، چمیشاں 197 چہ کوھسار تھانہ ءَ ایپ آئی آر ھوار کتگ اَت، وھدے کہ ڈاکٹر ماھرنگ بلوچ 85 مردمانی ھمراھی ءَ ترنول تھانہ ءَ ایپ آئی آر ءَ ھکومت، استان، ءُ پاکستان ءِ لشکر ءِ ھلاپ ءَ جار پِرّینگ ءِ، دگ ءُ روڑ بند کنگ ءِ، لُچ ءُ پلینڈی کنگ ءِ ءُ مھلوک ءِ زندگی ءَ سان دیگ ءِ بُھتام ءَ نام گپت کتگ انت۔
انوگیں جاور ءَ جوڈیشل مجسٹریٹ ءَ BYC لانگ مارچ ءِ 85 مردم، گوں ھمراھی ءَ ڈاکٹر ماھرنگ بلوچ آجو کُتگ اَنت۔
آمیدگس ءِ ھکم ءِ گوشگ ءَ پولیس ءِ نیمگ ءَ چوشیں ھاسیں ھک ءُ راستیں سبوت پیش نہ کنگ ءَ، ءُ چہ ترنول تھانہ ءِ یک سب انسپکٹر ءَ بس بُھتام جَتگ اَت۔ ھمے درگت ءَ آمیدگس ءِ ھکم ءَ پولیس چُشیں ھاسیں شاھد ءُ گواہ پیش کنگ ءَ ناکام بوت، انچوش کہ جاور یک مھلوکی جاگہ ءَ پیش بوتگ اَت۔
چی ایشی ءَ گیش پولیس ءَ سی سی ٹی وی تامری سبوت ھم پیش کنگ ءَ ناکام بوتگ اَت کہ آئی ءَ بُھتام جتگ۔
آمیدگس ءَ وتی پیسلہ ءِ تہ ءَ گْوشت ، کہ اے جاور ءَ سیکشن A-249 ءِ درگت ملزمان ءِ منگ نامگ منّگ بوتگ، ءُ دراھیں ملزماناں چہ اے کیس ءَ آجو کنگ بنت، ءُ ملزمان زمانت ءِ سر ءَ اَنت ایشانی زمانت ھلاس کنگ بنت۔ کیس ءِ مڈی، اگاں کسے بیت کانونی وڑ ءُ ڈول ءَ کنگ بنت۔
چہ ملزمان ءِ نیمگ ءَ مقدمہ ءِ جنگ کنوک وکیل ھبیب کریم بلوچ ءَ گْوشتگ اَت کہ کوھسار تھانہ ءِ ایپ آئی آر ءَ نامگپتیں 197 مردماں ھم جوڈیشل مجسٹریٹ شھزاد ھان آجو کتگ اَنت۔
گوشدارگ بہ بیت کہ بلوچ یکجھتی کمیٹی ءِ لانگ مارچ گوستگیں سال 6 دسمبر 2023 ءَ بلوچستان ءِ شھر چہ تُربت ءَ بندات بوتگ اَت اے مارچ ناشرکاریں کارگس ءِ سی ٹی ڈی ءِ آمیدگس ءِ پادمال کنگ ءِ ھلاپ اَت، چمیشی ءَ یک بلوچ ورنایے بالاچ بلوچ دزگیر کنگ ءَ پد کُشتگ اَت ئِے، لانگ مارچ ءِ کھول 20 دسمبر 2023 ءَ اسلام آباد ءَ رستگ۔
چہ ایشی ءَ پد بلوچ یکجھتی کمیٹی ءَ نیشنل پریس کلب، اسلام آباد ءِ دیم ءَ یک زھرشانی کیمپے اڑ دات، ھمے میان ءَ پولیس ءَ گیش گوں وتی تاکت ءَ مھلوکانی ھلاپ ءَ ایپ آئی آر دزنبشت کنگ ءَ پد دزگیر اش کُت انت۔ زھرشانی کنوکاں پہ زمانت ءَ یل اِش داتگ اِت اَنت ءُ چموداں آ 23 جنوری 2023 ءَ ھم زھرشانی کیمپ ءَ جار پرّینگ ءَ بوتگ اِت اَنت۔
داں یک ماھے ءَ یکشل ءَ زھرشانی ءِ دھرنہ پد بلوچ یکجھتی کمیٹی ءَ وتی زھرشانی ھلاس کنگ ءَ پد واتر بلوچستان ءَ اتک اَنت۔